Ақмола облысында медицина кадрларының тапшылығын шешу бойынша шаралар талқыланды
Ақмола облыстық мәслихатының тұрақты комиссияларының бірлескен отырысында денсаулық сақтау саласындағы мамандарды қолдаудың ағымдағы жағдайы мен перспективалары туралы мәселе қаралды. Негізгі тақырыптардың бірі - кадр тапшылығы мәселелерін талқылау және оларды шешудің тиімді жолдарын анықтау.
Ақмола облысының денсаулық сақтау басқармасы ұсынған ақпаратқа сәйкес, қазіргі уақытта жергілікті атқарушы органның білім беру гранттары бойынша 423 студент оқиды, оның ішінде 235 бакалавр, 99 интерн және 89 резидент. 2025 жылы «Жалпы медицина» мамандығы бойынша бакалаврлардың алғашқы 48-і оқуларын тәмамдап облыстың емдеу ұйымдарына жіберілді. Қосымша, республикалық грант бойынша 2025 жылы өңірге 186 резидент бекітілді.
Дегенмен, ұлттық денсаулық сақтау кадр ресурстары обсерваториясының деректері бойынша Ақмола облысының денсаулық сақтау саласындағы жалпы кадр тапшылығы 2025 жылғы жағдай бойынша 406 маманды құрайды. Сонымен қатар, 2021-2024 жылдар аралығында ЖАО гранттары бойынша 128 резидент даярланды, олардың едәуір бөлігі әртүрлі себептермен — декреттік демалыстар, гранттық қаражатты қайтару, жұмысқа орналасу аймағының өзгеруі бойынша міндетті пысықтауды аяқтамады.
«Ш. Уәлиханов атындағы Көкшетау университеті» КЕАҚ жоғары медицина мектебінің директоры Светлана Мұратбекова отырыс барысында Ақмола облысының тұрғындары - талапкерлерді бакалавриат және интернатура бағдарламаларына мақсатты түрде қабылдау қажеттігіне назар аударды. Мұндай шара бастапқыда туған аудандар мен елді мекендерде жұмысқа бағдарланған түлектер есебінен өңірдің денсаулық сақтау саласының кадрлық әлеуетін нығайтуға мүмкіндік береді.
Сондай — ақ, жаңа оқу жылынан бастап университетте алғаш рет «Кардиология (ересектер, балалар)» бағыты бойынша резидентураға қабылдау басталғаны атап өтілді - облыста сұранысқа ие 6 болашақ мамандарды оқыту жоспарлануда.
Комиссия мүшелері медициналық кадрларды өңірлік даярлауды, оның ішінде міндетті түрде пысықталатын білім беру гранттарын ұсыну арқылы қолдау, әсіресе ауылдық жерлерде медициналық көмектің қолжетімділігі мен сапасын арттырудың пәрменді тетігі екенін атап өтті. Мұндай шаралар кадрлық жағдайды тұрақтандыруға ғана емес, аумақтардағы әлеуметтік тұрақтылықты нығайтуға да ықпал ететін болады.
Отырыс соңында депутаттар бұл мәселені тұрақты бақылауға алу туралы шешім қабылдап, сондай-ақ саланы кадрлармен қамтамасыз етудің жүйелі тәсілін күшейту үшін білім беру, денсаулық сақтау органдары мен жергілікті атқарушы билік арасындағы ведомствоаралық өзара іс-қимылды жандандыруды ұсынды.