Жамбыл облыстық мәслихатының кезектен тыс XXV сессиясында 2025–2027 жылдарға арналған бюджетке өзгерістер енгізу мәселесі қаралды

2025 жылдың 26 тамызында Сегізінші шақырылған Жамбыл облыстық мәслихатының кезектен тыс жиырма бесінші сессиясы өтті. Сессия жұмысына облыстық мәслихат депутаттары, Жамбыл облысы әкімінің орынбасарлары, басқарма басшылары және бұқаралық ақпарат құралдарының өкілдері қатысты.

Сессия күн тәртібіндегі негізгі мәселе – 2025–2027 жылдарға арналған облыстық бюджетке өзгерістер енгізу болды. Аталған өзгерістер ҚР Премьер-Министрі Жамбыл облысына жасаған жұмыс сапары барысында берген тапсырмаларды орындау мақсатында қолға алынып отыр.

Бюджет қаражатын қайта бөлудің басты мақсаты – облыс аумағында стратегиялық маңызы бар жобаларды іске асыру және әлеуметтік маңызға ие бағыттарды қаржыландыруды қамтамасыз ету. Бұл ретте, үнемделген қаражат есебінен бірнеше өзекті салаға қосымша қаржы бөлу көзделді.

Атап айтқанда:

• 2,3 млрд теңге – облыстағы азық-түлік қорының тұрақтылығын қамтамасыз етуге бағытталды. Бұл қаражат әлеуметтік маңызы бар азық-түлік өнімдерінің тапшылығын болдырмауға, баға тұрақтылығын сақтауға және азық-түлік интервенцияларын уақтылы жүргізуге мүмкіндік береді.

• 160 млн теңге – Қордай ауданындағы «Қарасу» шекара өткізу бекетінің маңындағы жер телімдерін сатып алуға бөлінді. Бұл өз кезегінде шекаралық инфрақұрылымды дамытуға, өткізу пунктінің жүктемесін азайтуға және көлік-логистикалық әлеуетті арттыруға ықпал етпек.

Сессия барысында депутаттар бюджет қаражатының мақсатты әрі тиімді жұмсалуына қатысты өз пікірлерін білдіріп, ұсыныстарын ортаға салды. Облыстық экономика және бюджеттік жоспарлау басқармасының өкілдері енгізілетін өзгерістердің негіздемесін баяндап, сұрақтарға жауап берді.

Қабылданған шешімдер Жамбыл облысының әлеуметтік-экономикалық дамуына оң әсерін тигізіп, өңір тұрғындарының әл-ауқатын арттыруға бағытталмақ. Мәслихат сессиясының қорытындысы бойынша тиісті қаулы қабылданды.