ЖЕР ҚАТЫНАСТАРЫ БОЙЫНША ЖҰМЫС ЖИЫНЫ ӨТТІ

Бүгін аудандық мәслихаттың төрағасы Нұрлан Қойбағаров жер мәселесіне қатысты жұмыс жиынын өткізді.

Жиынның күн тәртібінде Бірінші Мамыр, Киелітас және Кемеқалған ауылдық округтерінің бас жоспарына өзгерістер енгізу мәселесі қаралды. Аталған өзгерістер елді мекендердің аумақтық дамуын жүйелеу және инфрақұрылымды тиімді жоспарлау мақсатында талқыланды.

Басқосуға аудандық құрылыс, сәулет және қала құрылысы бөлімінің басшысы қызметін атқарушы Құттымұрат Тұрғынбаев, аудандық жер қатынастары бөлімінің басшысы Бектөре Есжан, Бірінші Мамыр ауылдық округінің әкімі Бақытбек Маусынбеков, Кемеқалған ауылдық округінің әкімі Пердебек Ескулов және Киелітас ауылдық округінің әкімі Баймырза Адамбек қатысты.

Жиын барысында мәслихат төрағасы елді мекендердің бас жоспары мен бас схемасын жоспарлау жұмыстарының маңыздылығына тоқталды. Оның айтуынша, кешенді жоспарлау өңірдің әлеуметтік-экономикалық дамуына, өндірістік және шаруашылық әлеуетінің артуына оң әсер етеді. Сонымен қатар қоныстандыру жүйесін жетілдіру, инженерлік, көліктік, әлеуметтік және экологиялық ахуалды жақсарту және тарихи-мәдени мұра объектілерін сақтау – басты бағыттардың бірі екені атап өтілді.

Жиын қорытындысында Нұрлан Қойбағаров ауылдық округ әкімдеріне елді мекендердің шекарасын нақтылап, бекіту үшін тиісті құжаттарды заң талаптарына сай дайындау жөнінде тапсырмалар берді.

 

Төлеби аудандық мәслихатының баспасөз қызметі