Аудандық мәслихаттың тұрақты комиссиясының және Қоғамдық кеңестің бірлескен отырысы

2026 жылғы 3 маусымда аудандық мәслихатта бюджет, әлеуметтік-экономикалық даму, өнеркәсіп, ауыл шаруашылығы, жер қатынастары, кәсіпкерлік және экология мәселелері жөніндегі тұрақты комиссияның және Шортанды ауданының Қоғамдық кеңесінің бірлескен отырысы өтті.

Отырыс жұмысына аудандық және облыстық мәслихаттардың депутаттары, Қоғамдық кеңес мүшелері, аудан әкімінің орынбасары А. Керімбаев, ауылдық округтер мен кенттердің әкімдері, ауданның мемлекеттік мекемелері мен дербес бөлімдерінің басшылары қатысты..

Отырысты Шортанды ауданының Қоғамдық кеңесінің төрағасы А. Доброскок өткізді.

Отырыс барысында ауданның әлеуметтік-экономикалық дамуына, бюджет қаражатын пайдалану тиімділігіне және мемлекеттік қызметтердің сапасын арттыруға қатысты бірқатар маңызды мәселелер қаралды.

Ауданның экономика және қаржы бөлімінің басшысы Ж.Мұнтаева 2025 жылға арналған бюджет қаражатын мақсатты пайдалану және игеру туралы есеп берді. Отырысқа қатысушылар аудандық бюджеттің атқарылуын, мемлекеттік бағдарламалардың іске асырылуын және бюджет қаражатын жұмсаудың тиімділігін талқылады.

Шортанды ауданы бойынша мемлекеттік кірістер басқармасы басшысының орынбасары Е. Ахметов аудан бюджетіне 2025 жылға салықтар мен басқа да міндетті төлемдердің толық түсуін қамтамасыз ету жөніндегі жұмыс туралы хабарлады. Салық тәртібін арттыру және бюджеттің кіріс бөлігін ұлғайту мәселелеріне ерекше назар аударылды.

Күн тәртібіндегі соңғы мәселе 2025-2029 жылдарға арналған Шортанды ауданы бойынша жайылымдарды басқару және оларды пайдалану жөніндегі Жоспарға өзгерістер енгізуді талқылау болды. «Шортанды ауданы әкімінің аппараты» ММ мемлекеттік құқықтық бөлімінің басшысы Н. Быкова баяндама жасады. Талқылау қорытындысы бойынша келіп түскен ұсыныстар мен ұсынымдарды ескере отырып, жоспардың жобасын жұмыс тәртібімен пысықтау, содан кейін оны аудандық мәслихаттың жақын сессиясының қарауына шығару туралы шешім қабылданды.

Қаралған әрбір мәселе бойынша мемлекеттік органдардың жұмысын одан әрі жетілдіруге және қабылданатын шешімдердің тиімділігін арттыруға бағытталған ұсыныстар мен ұсынымдар айтылды.