АУДАНДЫҚ МӘСЛИХАТТЫҢ КЕЗЕКТІ 33 СЕССИЯСЫ ӨТТІ

 18 шілде күні  аудандық мәслихат төрағасы М.Тұрабаевтың төрағалығымен және аудан әкімі А.Жандарбековтың қатысуымен VIIІ шақырылған аудандық мәслихаттың кезекті 33 сессиясы өтті.

Сессия жұмысына аудан әкімінің орынбасары, мекеме, дербес бөлім басшылары, кент және ауылдық округ әкімдері, бұқаралық ақпарат құралдарының өкілдері қатысты.

Сессияның күн тәртібінде 3 мәселе қаралды.

Атап айтқанда,

1. «Шиелі ауданы әкімінің өзіне жүктелген функциялар мен міндеттерді орындауы туралы» аудан әкімінің есебі.

2. Аудандық мәслихаттың 2024 жылғы 12 сәуірдегі «Ана мен бала денсаулығын қорғау шараларының ауданда орындалу барысы жайлы» №15/2 шешімінің орындалуы туралы.

3. Шиелі кенті және Ақтоған, Бәйтерек, Жуантөбе, Керделі, Иіркөл ауылдық округіндегі атауы жоқ көшелерге «Ұлы Отан соғысы» ардагерлерінің есімдерін беру туралы.

Күн тәртібіндегі бірінші мәселе бойынша аудан әкімі баяндама жасады. Баяндамасында аудан әкімі Шиелі ауданы 2025 жылдың І жартыжылдығында әлеуметтік-экономикалық даму көрсеткіштері бойынша облыста 1-орында тұрғанын және аудан бюджеті 16,3 млрд теңгеге нақтыланып, салық түсімі 108%-ға, өзіндік кіріс 131,9%-ға орындалғанын атап өтті. Құны 68,2 млрд теңгені құрайтын 9 ірі инвестициялық жоба жүзеге асырылуда.

Жалпы сессияның күн тәртібіндегі мәселелер қаралып, депутаттар тарапынан ұсыныс-пікірлер айтылып, тиісті шешімдер қабылданды.

Сессия соңында, аудан әкімі А.Жандарбеков аудан депутаттарын бірлесе отырып жергілікті атқарушы және жергілікті өкілді органның жұмыстарын жүйелі түрде ұйымдастырып, бірігіп жұмыс жасауға шақырды.