Республика күні - ұлттық мереке

       Тәуелсіздігіміздің алтын тұғыры саналатын Республика күнінің маңызы зор. Ұлттық мүддеміз бен тарихи кескін-келбетімізді биік қою – үлкен міндет. Республика күні – тәуелсіздігіміздің жаршысы, оған жол ашқан тарихи оқиғаны айғақтаушы күн. Бекем бірлік, ұлтаралық келісім мен саяси тұрақтылық рухани байлығымыз.

       Ағымдағы жылы 24 қазан күні Сарысу аудандық мәдениет үйінде Республика күні – ұлттық мерекеге орай салтанатты шара өтті.

       Мерекелік шараға Сарысу ауданының әкімі Сакен Мамытов, Сарысу аудандық мәслихатының төрағасы Шаттық Мұсабеков, мекеме, кәсіпорын басшылары мен қызметкерлері, қала тұрғындары қатысты.

       Аудандық мәслихат төрағасы Шаттық Мұсабеков ауданның әлеуметтік-экономикалық дамуына қосқан елеулі үлесі мен жемісті еңбегі үшін және ұлттық мерекеге орай ауданның бірқатар сала мамандарын Сарысу ауданының Құрмет грамотасымен және аудандық мәслихаттың Алғыс хатымен марапаттады.

       Мерекелік шараның соңы қазақ эстрадасының танымал әншілері Жанболат Ербатыров пен Жазира Байырбекова қоңыр сазды әндерін әнсүйер көпшілікке тартуымен және аудан өнерпаздарының концерттік бағдарламасына ұласты.

       Мемлекетіміздің егемендігі мәңгі, бейбіт өмірдің берекесі, халқымыздың ынтымақ-бірлігі әрқашан бекем болсын. Ел іргесі аман, келешегіміз кемел болсын.