Жастар күні атап өтілді

Қай кезде де халқымыз өзінің болашағы - жастар саясатына, тәрбиесіне үлкен кө­ңіл бөліп отырған. Жастар - қоғамның болашағы, қозғаушы күші, мемлекетімізде маңызды рөл атқарады. Бүгінде жастар саясаты тәуелсіз еліміздің басты басымды­қтарының бірі, ел ертеңін айқындайтын басым бағыт. Қазіргі таңда жастардың рухани білім алуы, кәсіби қалыптасуы мен салауатты өмір салтын сақтау, басқада өзекті мәселелерін тиімді шешу, құқықтарын қорғауға баса мән берілуде.

Өткен аптада Халықаралық жастар күніне орай Жаңатас қаласының орталық алаңында «Jastar Live» атты жастар кеші өтті.

Шараға Сарысу ауданы әкімінің міндетін атқарушы Жаңғозы Жаркенов, Сарысу аудандық мәслихаты аппаратының басшысы Бақыт Жұмағұлов, мекемелер мен қала тұрғындары қатысты.

Мәслихат аппаратының басшысы Бақыт Жұмағұлов құттықтау сөз сөйлеп: -Ауданымызда мемлекеттік жастар саясатын жүзеге асыру, қала және ауылдық округтерде мемлекеттік бағдарламаларды насихаттау, жастардың бос уақытын тиімді пайдалануға арналған түрлі форматта мәдени, діни, спорттық тағы басқа                               іс шараларды ұйымдастыру - жастар саясатының басты мақсаты болып табылады. Мемлекеттік бағдарламалар аясында жастарымыз тұрақты және уақытша жұмыспен қамтылуда, мемлекеттік грантты жастар иеленіп, кәсіптерін жүргізуде. Жастардың салауатты өмір салтын қалыптастыруға, дене шынықтыруын арттыруға үлкен көңіл бөлінеді. Оған Жаңатас қаласы мен ауылдық жерлердегі жұмыс істейтін спорт алаңдары, жаңадан салынған спорт кешендері дәлел бола алады. Спорт мектептердегі спорт секцияларында жастарымыз спорттың әр түрімен айналысуда. Еліміздің ертеңі, мемлекетіміздің жарқын болашағы білімді де білгір жастардың қолында - деді.

Құттықтаудан соң, мәслихат аппаратының басшысы Бақыт Жұмағұлов аудандағы жастар саясатының жүзеге асырылуына қосқан үлесі үшін және Халықаралық жастар күніне орай бірқатар жастарды Сарысу аудандық мәслихатының Алғыс хатымен және сыйлықтармен марапаттады.

Тараз қаласынан арнайы қонақ болып келген жайдарманшы Еламан Юсупов және «Alem band» тобы өнерлерімен мерекелік көңіл-күй сыйлады.