Мәслихат аппаратының қызметкерлері мәдени іс-шараға қатысты

Ұжымда оң атмосфера қалыптастыру және этикалық құндылықтарды нығайту мақсатында мәслихат аппаратының қызметкерлері мәдени іс-шараға қатысып, қырық жылға жуық уақыттан бері қазақтың ұлттық ән өнерін насихаттап келе жатқан «Беу, жігіттер» ансамблінің концертіне барды.

Қырық жылға жуық тарихы бар «Беу, жігіттер» ансамблі қазақтың ән өнерін дамытуға және халықтың бай мәдени мұрасын насихаттауға зор үлес қосып келеді. Ұжым 1986 жылы Баянауыл ауданында құрылған және осы уақыт ішінде бірнеше буын өнерпаздарды біріктірген шығармашылық бірлестікке айналды. Олар халық әндерін жаңғыртып қана қоймай, ұлттық өнерді халықаралық сахналарда лайықты түрде таныстырып келеді.

Өздерінің ерекше орындау мәнері, репертуарындағы ұлттық нақыш және жоғары сахналық мәдениетінің арқасында ансамбль көрермендердің ықыласына бөленіп, түрлі байқаулардың бірнеше мәрте жеңімпазы атанды. Бүгінде ұжым дәстүрлі ән өнерін дамытуға елеулі үлес қосып, жастарды ұлттық құндылықтарды құрметтеуге шабыттандыруда.