ҚАЛАЛЫҚ МӘСЛИХАТТЫҢ ТҰРАҚТЫ КОМИССИЯЛАРЫНЫҢ БІРЛЕСКЕН ОТЫРЫСЫ ӨТТІ
ҚАЛАЛЫҚ МӘСЛИХАТТЫҢ ТҰРАҚТЫ КОМИССИЯЛАРЫНЫҢ БІРЛЕСКЕН ОТЫРЫСЫ ӨТТІ
Бүгін, 14 тамыз күні Қызылорда қалалық мәслихатының экономика, кәсіпкерлікті дамыту, әлеуметтік сала және құқықтық тәртіп пен коммуналдық-шаруашылық, қала инфрақұрылымы, ауылшаруашылығы, жер және экология мәселелері жөніндегі тұрақты комиссияларының бірлескен отырысы өтті.
Комиссия жұмысына қалалық мәслихат төрағасы И.Құттықожаев төрағалық етті.
Күн тәртібіне «Жастарды қолдау және олардың құқықтарын қорғау жөніндегі іс-шаралардың Қызылорда қаласында жүзеге асырылуы туралы», «Қала бойынша білім беру ұйымдарының жаңа оқу жылына дайындығы және мектеп оқушыларының түрлі бағыттағы үйірмелерге қатысуы туралы», «Қала аумағында жол қауіпсіздігінің сақталуы мен қабылданған шаралар туралы», «Қала бойынша құрылысы жүргізіліп жатқан тұрғын үйлер мен сапасы туралы», «Кәсіпкерлікке, ауылшаруашылығы мақсатына және басқа да санаттарға берілген жер учаскілері туралы» мәселелері шығарылып, талқыланды.
Алдымен қалалық мәслихат депутаттары білім беру ұйымдарының жаңа оқу жылына дайындығымен, атап айтқанда, қаладағы №9 және №15 мектептерде жүргізіліп жатқан күрделі жөндеу жұмыстарының барысымен танысты. Аталған жұмыстарды аяқтау мерзімі 25 тамызға жоспарланған.
Сонымен қатар, қала аумағында жол қауіпсіздігін қамтамасыз ету және қабылданып жатқан шаралармен танысу мақсатында депутаттар Қалалық Полиция басқармасының жедел басқару орталығының жұмысын көрді.
Қызылорда қаласында қоғамдық қауіпсіздікті қамтамасыз ету және құқық бұзушылықтың алдын алу мақсатында 1400 бейнебақылау камерасы, 20 «Зияткерлік қиылыс» және 58 стационарлық жылдамдық өлшегіш құралдары орнатылған.
Комиссияның талқылау отырысында қалалық қоғамдық даму бөлімінің басшысы А.Қайруллаев, қалалық білім бөлімінің міндетін атқарушы Қ.Әбдіқадыров, Қызылорда қаласы Полиция басқармасы бастығының орынбасары Н.Пазылов, қалалық құрылыс бөлімінің басшысы А.Әнуар, қалалық ауыл шаруашылығы және жер қатынастары бөлімінің басшысы М.Әжібеков хабарлама жасап, сауалдарға жауап берді.
Комиссия отырысы барысында қалалық мәслихат төрағасы И.Құттықожаев «Жастар ресурстық» орталығының штатын ұлғайту, материалдық базасын жақсартуға жәрдемдесу, оның ішінде үлкен сыйымдылықтағы автокөлікпен қамтамасыз ету, депутат А.Төлегенова жастар жұмыссыздығын төмендету, тәжірибе жинақтау шараларын күшейту және қала аумағынан жаңа лагерлер ашу, А.Мұсабаева Қорқыт ата кешеніндегі қайта жаңғыртудан өткен амфитеатрды «Жастар ресурстық» орталығының теңгеріміне өткізу және тұрғын үйді өткізу барысында коммуналдық төлемдерді реттеу, депутат Т.Мақаш №138 орта мектепті күрделі жөндеу жұмыстарын жүргізу және спорт алаңын салу, депутат Н.Тұрғанбаев жеке құрылыс компанияларынан сатып алынған үйдің сапасы жөнінде, депутат И.Басықараев 2005 жылы өтініш берген тұрғындар сұранысын қанағаттандыру, депутат Д.Абизов Арай мөлтек ауданындағы Әбдіреев-Назарбаев көшелер қиылысындағы бағдаршамды реттеу, депутат Ә.Әбләзім «Бәйтерек» тұрғын ауданындағы жалдау мерзімі аяқталған тұрғындарға ұзарту мәселесіне қатысты сауалдар көтерді.
Комиссия отырысына қала әкімінің орынбасары А.Нұрмағанбетов, қалалық мәслихат депутаттары, тиісті қалалық дербес бөлім басшылары, кент және ауылдық округ әкімдері, қалалық Полиция, қалалық санитарлық-эпидемиологиялық бақылау, облыстық мемлекеттік сәулет – құрылыс бақылауы, құрылыс, денсаулық сақтау басқармалары, облыстық білім саласында сапаны қамтамасыз ету және еңбек инспекциясы комитетінің департаменті өкілдері мен аталған мәселелерге қатысты тиісті сала басшылары, бұқаралық ақпарат құралдары өкілдері қатысты.