Стратегия, шеберлік және бірлік: Қарағанды делегациясы «Senat open 2025» финалында

Облыстық мәслихат төрағасы Нұркен Кобжанов Сенат Спикері Мәулен Әшімбаев пен Қазақстан шахмат федерациясының президенті Тимур Турловтың қатысуымен өткен шахматтан ҚР Парламентінің II Ашық Кубогы – «Senat open 2025» турнирінің финалына Қарағанды облысының делегациясын бастап барды және салтанатты ашылу рәсіміне қатысты.

«Ел Президенті Қасым-Жомарт Кемелұлы Тоқаев шахматты насихаттауға үлкен мән береді. Мемлекет басшысы белгілеген міндеттер аясында жүйелі жұмыс жүргізілуде. Шахматты дамытудың 2027 жылға дейінгі кешенді жоспары әзірленіп, қабылданды. «Senat Open» республикалық турнирі екінші рет өткізілуде және жыл санап ойындарға деген қызығушылық айтарлықтай артып келеді. Мұндай жобалар азаматтардың зияткерлік әлеуетін дамыту және мемлекеттік басқару саласында аса қажетті дағдыларды қалыптастыру үшін ерекше маңызға ие деп санаймыз», – деді Сенат Спикері Кубок қатысушыларына арналған алғы сөзінде.

Қазақстан шахмат федерациясының президенті Тимур Турловтың пікірінше, турнир қатысушылардың кәсіби шеберлігін арттыруға, тәжірибе алмасуға және кәсіби байланыстарын нығайтуға тамаша мүмкіндік болды.

Бұл маңызды спорттық іс-шара еліміздің түкпір-түкпірінен үш мыңнан астам шахмат әуесқойларын жинады, олардың арасында депутаттар, мәслихат қызметкерлері, қоғамдық кеңес мүшелері, ардагерлер мен бұқаралық ақпарат құралдарының өкілдері бар.

Финалда 215 қатысушы бақ сынасты, оның ішінде 12-сі Қарағанды облысынан: облыстық мәслихат депутаттары Қадиша Оспанова, Абсалям Карин, сондай-ақ Абай, Ақтоғай аудандарынан, Қарағанды және Приозерск қалаларынан депутаттар, қоғамдық кеңес мүшелері және шахмат спортының ардагерлері болды.

Финалдық турдың қорытындысы бойынша Батыс Қазақстан облысының командасы жеңіске жетіп, «Senat Open 2025» кубогының иегері атанды, екінші және үшінші орынды Жамбыл облысы мен Астана қаласының командалары бөлісті. Қарағанды облысы іріктеу турларының қорытындысы бойынша «Senat Оpen 2025» шағын кубогының иегері атанды.