Ақтөбеде Мөңке бидің 350 жылдығы атап өтілді

Ақтөбеде қазақ биі, жырау және ойшыл Мөңке би Тілеуұлының туғанына 350 жыл толуы атап өтілді.

Мерейтой аясында ұлттық мұраны сақтауға және дамытуға бағытталған ауқымды мәдени, ғылыми және спорттық іс-шаралар ұйымдастырылды. Іс-шаралар ойшыл ескерткішіне гүл шоқтарын қоюдан басталды.

Сондай-ақ, Мөңке бидің өмірі мен мұрасына арналған халықаралық ғылыми-практикалық конференция, ұлттық спорт ойындары, жыр және мүшайра байқаулар, қазақ оркестрлерінің қойылымдары және ұлы би ұрпақтарының қатысуымен концерттік бағдарламалар ұйымдастырылды. Салтанатты шараға көрнекті ғылым, мәдениет және саясат қайраткерлері, Қазақстан мен шет елдердің сарапшылары, сондай-ақ мәслихат депутаттары мен Қоғамдық кеңес мүшелері қатысты.

Ақшат тұрғын алабында 60 ақ шаңқан киіз үйлерден жасақталған этноауыл түзілді. Шараның ресми ашылуы А.Жұбанов атындағы қазақ ұлт аспаптар оркестрінің орындауындағы Мөңке бидің «Қиқу дәурен» күйімен басталды. Оркестрдің бір сағаттық бағдарламасында қазақтың дәстүрлі күйлері, жырлары мен халық әндері шырқалды.

Мерейтой соңында этноауыл қонақтары ұлттық тағамдардан дәм татып, қолөнер шеберлерінің көрмесін тамашалап, қазақы салт-дәстүрдің көріністеріне куә болды.