Мәслихаттың тұрақты комиссияларының бірлескен отырысы өтті
25 тамызда мәслихаттың Заңдылық, құқықтық тәртіп және Әлеуметтік-мәдени даму комиссияларының бірлескен отырысы өтті.
Отырыста мектеп оқушылары арасындағы құқықбұзушылық, қаладағы қосымша білім беру мәселелері және инватакси қызметтерінің сапасы талқыланды.
Полиция басқармасының мәліметінше, жыл сайын кәмелетке толмағандармен жасалған қылмыс саны артуда. Оның ішінде денсаулыққа зақым келтіру, тонау, ұрлық, бопсалау, бұзақылық фактілері жиі кездеседі. Жыл басынан бері 2346 кәмелетке толмағандар ұсталған.
Сондай-ақ түнгі уақытта заңды өкілісіз жүрген (1865), ойын-сауық мекемелерінде болған (149), ата-анасына міндеттемелерін тиіс орындамағы үшін (404 ата-ана) хаттамалар толтырылып, тиісті кәсіпкерлерге шаралар қолданылған.
Кәмелетке толмаған балалардың істерін қарау және құқықтарын қорғау бойынша қалалық, аудандық әкімдіктерде арнайы комиссия жұмыс жасайды. Жыл басынан бері 100 материал қаралып, арнайы мектепке жіберу, есепке қою, емделуге жіберу, арнайы орталықтарға жолдау, т.б. шешімдер шығарылып, отбасыларға әлеуметтік, психологиялық көмек көрсетілген.
Қосымша білім беру мәселесі бойынша 16 ұйымдарда 570 түрлі үйірмелер жұмыс жасайды. Оның 292-і ақысыз негізде. 2024-2025 оқу жылында бұл үйірмелерге 16 635 оқушылар қатысқан. 16 мекеменің 3-уі күрделі жөндеуді қажет етеді – Көркемсурет лицейі, Жас натуралистер стансасы, Ақжелкен аула клубы. Сондай-ақ Шаңырақ аула клубына қосымша филиал қажет. Білім бөлімінің басшысы Меткүл Қосымбаева бұл мәселелер алдағы оқу жылында шешілетінін атап өтті.
Депутаттармен мүгедектігі бар азаматтарға инватакси қызметін көрсету сұрағы да қаралды. Биыл инватакси қызметін көрсетуге бюджеттен 647,5 млн.тг. қаржы қаралған. Мердігерлер – «Ғажап», «InvaPark» ҚБ, «Ерекше таңдау» ЖШС. Барлығы 104 автокөлікпен қамтылған.
Биыл қызмет көрсету қағидаларына өзгерістер енгізілді. Атап айтқанда, инватакси қызметін алушылар санаты аутистік спектрдің бұзылысы, даун синдромы, жүйке жүйесінің аурулары, эпилепсия, церебральды сал ауруы, туа біткен сколиоз, денсаулықтағы басқа да кінараттар тізімімен толықтырылды.
Депутаттармен жасөспірімдер арасында құқықбұзушылықтың алдын алу шараларының, қосымша үйірмелер жұмысының тиімділігін арттыру, әлеуметтік роликтер түсіру, мектептердің оқу жылға дайындығы, оқушыларды тасымалдау және жаңа мектептердің автотұрақ мәселелеріне қатысты сұрақтар көтеріліп, тиісті ұсыныстар берілді.