Әлеуметтік нысандарды салу мәселесі қаралды

2025 жылғы 15 мамыр күні облыстық мәслихаттың бюджет, өңірлік және салалық даму жөніндегі тұрақты комиссиясының отырысында өңірдегі әлеуметтік нысандарды салу жөніндегі жоспарлар мен ағымдағы проблемаларды шешу мәселесі қаралды.

✅ Отырыста баяндама жасаған облыстық құрылыс, сәулет және қала құрылысы басқармасының басшысы Ержан Мұздыбаевтың айтуынша, биыл білім беру саласында 40 нысанның құрылыс-монтаждау жұмыстарына 36,7 млрд. теңге бөлінген. Сондай-ақ бүгінде су тасқыны салдарынан зардап шеккен 5 білім нысанының құрылыс жұмыстары жүргізілуде. Бұдан бөлек, денсаулық сақтау саласында — 19 , спорт саласында 9 нысан салынып, әлеуметтік қамсыздандыру саласы бойынша 3 нысан, төтенше жағдайлар объектілерін дамыту бойынша 3 нысанның құрылыс-монтаждау жұмыстары жүргізіледі.

💬 — Өңірде проблемалық нысандарды болдырмау мақсатында 2024 жылы жосықсыз жеткізуші мердігер ұйымдармен құрылыс-монтаждау жұмыстары бойынша 7 келісімшарт бұзылған болатын. Уақытылы қабылданған шешімдер нәтижесінде қазіргі таңда барлық нысан бойынша конкурстық рәсімдер өткізіліп, мердігер мекемелер анықталды, — деді басқарма басшысы.

☑️ Жиында облыстық мәслихат депутаттары баяндамашыға сауалдарын қойып, тілек-ұсыныстарын жеткізді.

📍 Отырыс нәтижесі бойынша нысандардың құрылысы уақытында аяқталу керектігі, сондай-ақ құрылыс жұмыстарындағы мәселелерді шешуде жауапты органдар қарқынды жұмыс істеу қажет екендігі айтылды.