БІЛІМ САЛАСЫ ҚЫЗМЕТКЕРЛЕРІМЕН ЕСЕПТІК КЕЗДЕСУ ӨТТІ

«AMANAT» партиясының халық алдындағы есептік кездесулері аясында Абай облысы мәслихатының төрағасы, депутат Шалқар Байбеков сайлау округі тұрғындарымен кездесті. 

Бұл жолғы кездесу Семей қаласындағы Шәкәрім атындағы №5 көпсалалы гимназиясында өтті. Жиынға 90-ға жуық білім беру саласының қызметкері қатысты.

Кездесуде депутат округ бойынша атқарылған жұмыстарға тоқталып, алдағы кезеңге жоспарланған бағыттарды таныстырды. Көтерілген мәселелер білім саласына қатысты болды. Оның ішінде білім беру ұйымдарының жай-күйі мен ұстаздарды толғандырған мәселелер сөз болды. Биыл гимназияның бастауыш корпусындағы дәлізді және 1, 2-қабаттардағы санитарлық тораптарды жөндеуге қаражат қарастырылған.

Кездесу ашық форматта өтті. Қатысушылар сұрақтарын қойып, ұсыныстарын жеткізді. Халық алдындағы есептік кездесулер алдағы уақытта да жалғасады.

 

АБАЙ ОБЛЫСЫ МӘСЛИХАТЫНЫҢ БАСПАСӨЗ ҚЫЗМЕТІ