Семейде «Abai akademiasy» энциклопедиялық порталы таныстырылды

Абай Құнанбайұлының 180 жылдығына арналған онкүндік мерейтойлық шаралар Абай облысында ресми түрде бастау алды.

Бүгін Семейдегі Мұхтар Әуезов атындағы педагогикалық колледждің «Ес-Аймақ» рухани орталығында «Abai akademiasy» энциклопедиялық порталының тұсаукесері өтті.

Іс-шараға облыс әкімі Берік Уәли, мәслихат төрағасы Шалқар Байбеков, абайтанушы ғалымдар мен зиялы қауым өкілдері қатысты.

Портал Абай мұрасын заманауи форматта ұсынатын ғылыми-танымдық платформа ретінде таныстырылды. Онда ақынның әдеби, ғылыми, публицистикалық еңбектері мен архивтік деректер, бейнематериалдар топтастырылған.

Сондай-ақ онкүндік аясында этноауыл көрмесі, Аңсаған Мұстафаның авторлық экспозициясы және мерейтойлық гала-концерт өтуде.