Түпқараған ауданының коммуналдық қызметі жаңа техникамен толықты

Түпқараған аудандық су жүйесі мекемесіне көлемі 20 тонна болатын екі жаңа ассенизатор көлігі табысталды. Арнайы техникалар Баутино, Аташ және Форт-Шевченко елді мекендерінің тұрғындарына қызмет көрсететін болады.

Салтанатты шара барысында аудан әкімінің орынбасары Дидарбек Жантуаров сөз сөйлеп, коммуналдық қызметті жақсарту жұмыстарының кезең-кезеңімен жалғасатынын атап өтті.

- Біздің басты мақсатымыз – тұрғындардың сұранысын ескеріп, күнделікті тұрмысын жеңілдетуге жағдай жасау. Бүгін пайдалануға берілген арнайы техника – халық үшін маңызды көмек құралы. Бұл — бастаманың басы ғана. Алдағы уақытта да қажетті техникалармен қамту жалғасын табады, – деді Дидарбек Жантуаров.

Айта кету керек, бұған дейін аталмыш мекемеге 5 жаңа су тасымалдайтын көлік берілген болатын.