Маңғыстауда "Жайлы мектеп" ұлттық жобасы аясында 2025 жылға дейін 44 мектеп салынады

30 қыркүйекте өңір басшысының төрағалығымен жиын өтіп, онда Маңғыстау облысында "Жайлы мектеп" ұлттық жобасын іске асыру барысы талқыланды, деп хабарлайды Маңғыстау облысы әкімінің баспасөз қызметі.

2022 жылдың басында Қазақстан Республикасының Президенті Қасым-Жомарт Тоқаев ұлттық жобалардың тізбесіне қол қойды, солардың бірі 2025 жылға дейін мектептерде орын тапшылығын азайту, үш ауысымды және апатты мектептерді жою мақсатында 1000 мектеп салу болатын.

"Жайлы мектеп" ұлттық жобасы аясында 2023-2025 жылдары Маңғыстауда барлығы 86 800 орынға (екі ауысымда) 44 білім беру нысанын (35 жалпы білім беретін мектеп, 9 бастауыш мектеп) салу жоспарлануда.

Атап айтқанда, Ақтау қаласында - 17 мектеп, Жаңаөзенде - 5 мектеп, Бейнеуде - 6 мектеп, Қарақияда - 2 мектеп, Мұнайлыда - 10 мектеп,
Түпқарағанда - 2 мектеп және Маңғыстау ауданында - 2 мектеп салу жоспарлануда.

Облыс әкімі оқушылардың білім алуы үшін қалыпты жағдай жасау жергілікті атқарушы органдардың маңызды міндеті екенін атап өтті.

- Мемлекет Басшысы Қасым-Жомарт Тоқаев Қазақстан халқына Жолдауында 2025 жылға дейін мектептерде орын тапшылығын жою үшін кемінде мың мектеп салуды тапсырды. Бұл кәсіби оқытушылар құрамы және балаларды дамыту үшін қосымша мүмкіндіктері бар заманауи, жақсы жабдықталған техникалық білім беру мекемелері болуы керек. Бүгінгі таңда ұлттық жоба аясында Индустрия және инфрақұрылымдық даму министрлігі 300, 600, 900, 1200, 1500, 2000, 2500 орындық мектеп құрылысы мен жабдықтардың бірыңғай стандартын қамтамасыз ету үшін жалпы білім беретін мектептердің жобаларын әзірледі. Осыған байланысты біз тапсырманы белгіленген мерзімде бірлесіп орындап, кестеге сәйкес әрекет етуіміз керек. Ертеңгі күні тапсырмаларды орындау барысында ешқандай сылтаулар айтылмау керек. Жауапты тұлғаларға білім беру нысандарының уақытында салынуын және сапалы құрылысын қамтамасыз етуді тапсырамын, - деді Нұрлан Ноғаев.