Құрметті Маңғыстау облысының тұрғындары мен қонақтары!

Баршаңызды халқымыз үшін маңызы зор мереке –Конституция күнімен шын жүректен құттықтаймын!
Биыл Тәуелсіз Қазақстанның Ата Заңы қабылданғанына 30 жыл толып отыр. 1995 жылдың 30 тамызында қабылданған Конституция - мемлекеттігіміздің, бірлігіміз бен тәуелсіздігіміздің берік тұғырына айналды.
Конституция - ел дамуының стратегиялық бағдары мен болашағын айқындайтын басты құжат.

Мемлекет басшысы Қасым-Жомарт Кемелұлы Тоқаев: «Ата Заң ел бірлігін және адамның ар-ұжданы мен абыройына қол сұғуға болмайтынын негіздеп, кемсітудің кез-келген түріне тыйым салу арқылы ұлтымызды ұйыстырады»,- деп бұл күннің айрықша маңызға ие екенін айтты.

Мемлекет пен қоғамның орнықты дамуына жол ашқан Конституция экономикалық өрлеу мен азаматтардың әл-ауқатының артуын қамтамасыз етіп келеді. Ата Заңда көрсетілген қағидалардың салтанат құруы бұл ішкі тұрақтылықтың кепілі. Сондықтан, баршамыз Ата заңымызды құрметтеп, ел игілігі жолында бірлесе еңбек ете берейік.

Ардақты ағайын!

Баршаңызды айтулы мерекемен шын жүректен құттықтай отырып, зор денсаулық, еңбекте табыс, отбасыларыңызға бақыт тілеймін!
Ынтымағы жарасқан еліміздің бағын асыратын, мерейін тасытатын үлкен істе жаңа жетістіктерге жетулеріңізге тілектеспін. Еліміз аман, жұртымыз тыныш болғай! Көк байрағымыз көгімізде мәңгі желбірей берсін!

Құрметпен, Маңғыстау облысының әкімі Нұрдәулет Қилыбай