Маңғыстау ауданының Тұщықұдық ауылында Маңғыстау облысының әкімі Нұрдәулет Қилыбайдың қатысуымен «Қөңдіқұдық – Тұщықұдық» су құбыры пайдалануға берілді. Жобаның нәтижесінде Тұщықұдық және Шебір ауылдарының тұрғындары тұрақты түрде сапалы ауыз сумен қамтамасыз етілді. Бұл өңірдегі инженерлік инфрақұрылымды дамыту мен ауыл тұрғындарының өмір сүру сапасын арттыру бағытындағы маңызды жобалардың бірі.
Нысанның ашылу рәсімінде өңір басшысы халықты сапалы ауыз сумен қамтамасыз ету Мемлекет басшысы Қасым-Жомарт Тоқаевтың тапсырмасына сәйкес жүзеге асырылып жатқан мемлекеттік саясаттың негізгі басымдықтарының бірі екенін атап өтті.
– Мемлекет басшысы халықтың өмір сүру сапасын арттыруға, оның ішінде әрбір елді мекенді сапалы ауыз сумен қамтамасыз етуге ерекше көңіл бөліп келеді. Маңғыстау облысында бұл бағыттағы жұмыстар жүйелі әрі кезең-кезеңімен жүзеге асырылуда. Бүгін іске қосылып отырған «Қөңдіқұдық – Тұщықұдық» су құбыры Тұщықұдық пен Шебір ауылдарының тұрғындарын сапалы ауыз сумен үздіксіз қамтамасыз етуге мүмкіндік береді. Әрбір осындай жоба ауылдық аумақтарды дамытуға, тұрғындардың тұрмыс сапасын жақсартуға бағытталған, – деді Нұрдәулет Қилыбай.
Жоба аясында ұзындығы 15 шақырымнан асатын жаңа су құбыры тартылды.
Жаңа нысанның іске қосылуы нәтижесінде екі ауылға қосымша су жеткізу мүмкіндігі артты. Енді елді мекендерге тәулігіне 200 текше метр ауыз су беріліп, 481 тұрғын үйде тұратын 3,5 мыңнан астам адамның қажеттілігі қамтамасыз етіледі. Бұл жоба сумен жабдықтау жүйесінің сенімділігін күшейтіп, ауылдардың әлеуметтік-экономикалық дамуына оң серпін береді.
Маңғыстау облысында сумен жабдықтау жүйесін дамыту басым бағыттардың бірі болып қала береді. Инфрақұрылымдық жобаларды кезең-кезеңімен жүзеге асыру ауыл тұрғындарын сапалы ауыз сумен қамтамасыз етуге, коммуналдық жүйелерді жаңғыртуға және халықтың өмір сүру сапасын арттыруға мүмкіндік береді.
Маңғыстау облысы әкімінің баспасөз қызметі
31 шілдеде Ақтау қаласында Маңғыстау облысы бойынша Экономикалық тергеп-тексеру департаменті ұйымдастырған Қазақстан Республикасы Қаржылық мониторинг агенттігі жас қызметкерлерінің Батыс өңірлік слетінің екінші күні өтті. Іс-шараға Маңғыстау облысының әкімі Нұрдәулет Қилыбай қатысты.
Батыс өңірлік слетке Атырау, Ақтөбе, Батыс Қазақстан және Маңғыстау облыстарынан келген жас қызметкерлер жиналды. Іс-шараның мақсаты – кадрлық әлеуетті нығайту, жас мамандардың кәсіби құзыреттерін дамыту, ведомствоаралық өзара іс-қимылды жетілдіру және елдің экономикалық қауіпсіздігін қамтамасыз ету саласындағы тәжірибе алмасу.
Іс-шараға сондай-ақ Қазақстан Республикасы Қаржылық мониторинг агенттігі Төрағасының орынбасары Жеңіс Елемесов, өңірдің құқық қорғау және арнайы мемлекеттік органдарының басшылығы қатысты.
Қатысушыларды құттықтаған облыс әкімі Нұрдәулет Қилыбай қазіргі жаһандық сын-қатерлер жағдайында экономикалық қауіпсіздікті қамтамасыз ету және білікті кадрлар даярлау мемлекеттік саясаттың маңызды бағыттарының бірі екенін атап өтті.
– Қазақстан Республикасының Президенті Қасым-Жомарт Тоқаев кәсібилік, жауапкершілік және мемлекетке адал қызмет ету мемлекеттік қызметшілер мен құқық қорғау органдары қызметкерлерінің басты қағидаттары болуға тиіс екенін бірнеше рет атап өтті. Заманауи білімге, жоғары құқықтық мәдениетке және қоғам алдындағы жауапкершілік сезіміне ие жас мамандар – еліміздің одан әрі дамуының қозғаушы күші. Осындай алаңдар кәсіби біліктілікті арттырып қана қоймай, өңірлер арасындағы ынтымақтастықты, корпоративтік мәдениет пен өзара сенімді нығайтуға ықпал етеді, – деді Нұрдәулет Қилыбай.
Слеттің білім беру бағдарламасы аясында қатысушылар экономикалық құқық бұзушылықтардың алдын алу, анықтау және тергеп-тексерудің заманауи тәсілдерін талқылап, практикалық тәжірибе алмасты. Сондай-ақ олар «Ықпал ету психологиясы және манипуляцияларға қарсы тұру» тақырыбындағы арнайы тренингке қатысып, көшбасшылық қасиеттерді дамыту, кәсіби коммуникацияны жетілдіру, эмоционалды тұрақтылық пен командалық жұмысты нығайту бағытында тәжірибе жинақтады.
Слет барысында жас қызметкерлер қаржылық мониторинг саласындағы өзекті сын-қатерлерді талқылап, өңіраралық ынтымақтастықтың жаңа тәсілдерін пысықтады. Сондай-ақ қызмет тиімділігін арттыруға бағытталған үздік тәжірибелермен алмасты.
Екі күнге созылған Батыс өңірлік слет кәсіби байланыстарды нығайтуға, жаңа буын кадрлық резервін қалыптастыруға және Қаржылық мониторинг агенттігінің аумақтық бөлімшелері арасындағы өзара іс-қимылды дамытуға мүмкіндік берді. Мұндай іс-шаралар экономикалық қауіпсіздікті нығайтуға, құқық қорғау жүйесінің тиімділігін арттыруға және қазіргі заман талаптарына сай жоғары білікті мамандар даярлауға бағытталған мемлекеттік саясатты іске асыруға ықпал етеді.
Маңғыстау облысы әкімінің баспасөз қызметі
Бүгін, 30 шілдеде Маңғыстау облысының әкімі Нұрдәулет Қилыбай Ақтау қаласындағы Азаматтарды қабылдау орталығында тұрғындарды жеке мәселелері бойынша қабылдады. Қабылдау бекітілген кестеге сәйкес алдын ала жазылу және кезектілік тәртібімен өтті.
Қабылдау барысында өңір тұрғындары тұрғын үймен қамтамасыз ету, жұмыспен қамту, әлеуметтік қолдау, денсаулық сақтау, жер қатынастары, кәсіпкерлікті дамыту және өзге де әлеуметтік маңызы бар мәселелерді көтерді.
Әрбір өтініш жан-жақты қаралып, көтерілген мәселелер бойынша облыс әкімі жауапты мемлекеттік органдарға, сондай-ақ қала және аудан әкімдіктеріне нақты тапсырмалар берді. Өтініштерді жан-жақты зерделеп, қолданыстағы заңнама аясында қажетті шараларды қабылдау және олардың уақытылы орындалуын қамтамасыз ету міндеттелді.
Нұрдәулет Қилыбай азаматтардың өтініштерімен жұмыс атқарушы органдар қызметінің негізгі бағыттарының бірі әрі мемлекеттік қызмет тиімділігінің маңызды көрсеткіші екенін атап өтті. Оның айтуынша, әрбір мәселе объективті қаралып, тұрғындармен ашық диалог орнатылып, заңнама талаптарына сәйкес нақты шешімдер қабылдануы қажет.
Өңір басшысы берілген тапсырмалардың орындалуын тұрақты бақылауда ұстауды, азаматтарды өтініштерінің қаралу барысы туралы уақтылы хабардар етуді және көтерілген мәселелерді шешуде мемлекеттік қолдау тетіктерін тиімді пайдалануды тапсырды.
Азаматтарды жеке қабылдау тұрақты негізде өткізіліп келеді және халық пен мемлекет арасындағы тікелей байланыстың маңызды тетіктерінің бірі болып саналады. Бұл тұрғындардың өтініштеріне жедел ден қоюға, мемлекеттік органдарға деген қоғамдық сенімді нығайтуға әрі азаматтардың заңды құқықтары мен мүдделерінің қорғалуын қамтамасыз етуге мүмкіндік береді.
Маңғыстау облысы әкімінің баспасөз қызметі
Маңғыстау облысында Мемлекет басшысы Қасым-Жомарт Тоқаевтың тапсырмасымен жүзеге асырылып жатқан стратегиялық маңызы бар инфрақұрылымдық жоба – Кендірлі жаңа әуежайының құрылысы белгіленген кестеге сәйкес жалғасуда. Жаңа әуе айлағы өңірдің көлік-логистикалық және туристік әлеуетін арттыратын негізгі даму нүктелерінің біріне айналмақ. Ол Кендірлі курорттық аймағына тікелей әуе қатынасын қамтамасыз етіп, инвестиция тартуға, кәсіпкерлікті дамытуға және туристер ағынын ұлғайтуға мүмкіндік береді.
Әуежай кешенінің негізгі нысандары бойынша жұмыстар қарқынды жүргізілуде. Атап айтқанда, ұшу-қону жолағының дайындығы – 71,8 пайыз, перронның – 63,2 пайыз, рульдеу жолының – 66,1 пайыз, жолаушылар терминалының – 51,7 пайыз. Сонымен қатар инженерлік инфрақұрылым құрылысы қатар атқарылуда. Сыртқы газ құбырының құрылысы 95 пайызға, сумен жабдықтау желілері 80 пайызға, сыртқы байланыс желілері 100 пайызға, электрмен жабдықтау желілері 85 пайызға орындалды.
Құрылыстың үздіксіз жүргізілуін қамтамасыз ету үшін қажетті материалдық-техникалық ресурстар толық жұмылдырылған. Қазіргі уақытта нысанда 132 арнайы техника жұмыс істейді. Оның 82-сі құрылыс алаңында еңбек етсе, тағы 50 техника инертті материалдарды үздіксіз жеткізуді қамтамасыз етуде. Құрылыс жұмыстарына күн сайын 290 маман тартылған.
Жоба кешенді түрде жүзеге асырылуда және оның орындалу барысы тұрақты бақылауда. Құрылыстың барлық төрт кезеңі бойынша әзірленген жобалық-сметалық құжаттама мемлекеттік сараптамадан өтіп, оң қорытынды алған. Қазіргі таңда жолаушылар терминалының, әуеайлақ инфрақұрылымы нысандарының және инженерлік желілердің құрылысы қарқынды жүргізілуде. Бұл өз кезегінде жобаны іске асыру қарқынын тұрақты деңгейде сақтауға мүмкіндік беріп отыр.
Әуежай пайдалануға берілгеннен кейін өңірдің көлік әлеуеті айтарлықтай артады. Маңғыстау облысының жолаушылар көлігі және автомобиль жолдары басқармасының мәліметінше, ішкі және халықаралық бағыттар бойынша тоғыз жаңа әуе бағытын ашу жоспарланып отыр. Ішкі рейстер Астана, Алматы, Ақтөбе, Атырау, Орал және Қызылорда қалаларына қатынайтын болса, халықаралық рейстер Нүкіс, Баку және Астрахань қалаларына ашылады. Бұл бағыттар өңірдің көлік байланысын жақсартып, тұрғындар мен туристер үшін қолайлы логистикалық мүмкіндіктер қалыптастырады. Сонымен қатар Кендірлінің Каспий теңізі жағалауындағы туризм мен іскерлік белсенділіктің жаңа орталығы ретіндегі әлеуетін күшейтеді.
Кендірлі әуежайының құрылысы – Мемлекет басшысының тапсырмасына сәйкес көлік инфрақұрылымын дамытуға, елдің транзиттік әлеуетін нығайтуға және экономикалық өсудің жаңа нүктелерін қалыптастыруға бағытталған жүйелі жұмыстың маңызды бөлігі. Жоба аяқталғаннан кейін Кендірлі курорттық аймағымен тікелей әуе қатынасы қамтамасыз етіліп, өңірдің туристік тартымдылығы артады. Сонымен қатар Батыс Қазақстанның логистикалық мүмкіндіктері кеңейіп, жаңа жұмыс орындары ашылып, Маңғыстау облысының әлеуметтік-экономикалық дамуына серпін береді.
Кендірлі әуежайының құрылысын 2026 жылдың соңында аяқтау жоспарланып отыр.
Маңғыстау облысының әкімі Нұрдәулет Қилыбай жұмыс сапары барысында өңірдегі маңызды инфрақұрылымдық жобалардың бірі – республикалық маңызы бар «Таушық – Шетпе» автомобиль жолының учаскесіне орташа жөндеу жүргізу барысымен танысты.
Өңір басшысына ұзындығы 70 шақырымды құрайтын, 91-шақырымнан 161-шақырымға дейінгі жол учаскесіндегі жұмыстардың барысы баяндалды.
Жоба аясында жол төсемін кешенді жаңарту, екі қабатты асфальтбетон жабынын төсеу, жол жиектерін нығайту, жолға қосылатын учаскелер мен қиылыстарды жөндеу, сондай-ақ жол инфрақұрылымы элементтерін жаңғырту көзделген.
Бүгінде қалыңдығы 7 сантиметр болатын тығыз ірі түйіршікті асфальтбетон қоспасынан жасалған төменгі қабат 44,6 шақырым жолға төселді. Сонымен қатар тағы 41,5 шақырым жол учаскесінде төменгі қабатты төсеу жұмыстары орындалды. Нысанда күн сайын 39 арнайы техника мен 72 жұмысшы жұмылдырылған.
Облыс әкімі автомобиль жолдарын жаңғырту өңірдің көлік инфрақұрылымын дамытуға, жол қозғалысы қауіпсіздігін арттыруға, елді мекендер арасындағы көлік қатынасын жақсартуға және экономикалық өсімге жағдай жасауға мүмкіндік беретін маңызды фактор екенін атап өтті.
– Автомобиль жолдарының сапасы – халықтың өмір сүру сапасы мен өңірдің бәсекеге қабілеттілігінің көрсеткіші. Құрылыс жұмыстарының әрбір кезеңі қатаң бақылауда болуға тиіс. Құрылыс технологияларының талаптарын мүлтіксіз сақтауды, жұмыстарды белгіленген мерзімде аяқтауды және заманауи қауіпсіздік пен сапа талаптарына толық сәйкес келетін нысанды пайдалануға беруді қамтамасыз ету қажет, – деп тапсырды Нұрдәулет Қилыбай.
Бекітілген кестеге сәйкес жөндеу жұмыстары кезең-кезеңімен жүргізіледі. Жобаны толық аяқтап, нысанды 2027 жылы пайдалануға беру жоспарланып отыр.
Маңғыстау облысы әкімінің баспасөз қызметі
Ақтауда Қазақстан Республикасының Премьер-министрі Олжас Бектенов пен Өзбекстан Республикасының Премьер-министрі Абдулла Арипов Қазақстан мен Өзбекстан өңірлері басшылары кеңесінің бірінші отырысына қатысты.
Екі елдің көшбасшылары Қасым-Жомарт Тоқаев пен Шавкат Мирзиёевтің бірлескен шешімімен өңіраралық өзара іс-қимылдың жаңа тетігі құрылды.
Олжас Бектенов өз сөзінде Президент Қасым-Жомарт Тоқаевтың басшылығымен Қазақстан дамудың жаңа кезеңіне қадам басқанын атап өтті. Жаңа Конституцияны жүзеге асыру ұлттық экономиканы нығайту, инвестициялық тартымдылықты арттыру, бизнес үшін барынша қолайлы жағдай жасау және халықаралық ынтымақтастықты кеңейту үшін берік институционалдық негіз қалыптастырады.
«Біз бауырлас Өзбекстанмен стратегиялық әріптестік пен одақтастық қатынастарды жан-жақты дамытуға ерекше мән береміз. Өңірлер басшылары кеңесінің құрылуы мемлекеттеріміз арасындағы қарқынды саяси диалогтың дәйекті жалғасы болып, өзара сенім мен тату көршілікке негізделген ықпалдастықты кеңейтуге жаңа мүмкіндіктер ашады. Сонымен бірге, елдеріміз арасындағы сауда-инвестициялық байланыстарды одан әрі жандандыруда өңіраралық қарым-қатынастар орасан зор рөл атқарады. Кеңес жұмысы екі мемлекет басшыларының белгілеген көрсеткіштерін $10 млрд-қа дейін ұлғайту міндетіне қол жеткізуге елеулі үлес қосатынына сенімдімін»,
— деп атап өтті Олжас Бектенов.
«Біздің бүгінгі кездесуіміз Каспий теңізінің інжу-маржаны әрі өңіріміздің маңызды көлік-логистикалық хабы саналатын Ақтау қаласында өтуінің мәні зор. Қазақстан – Өзбекстан үшін жақын көрші ғана емес, сенімді стратегиялық серіктес әрі одақтас мемлекет. Өңіраралық әріптестік өзара іс-қимылымыздың басым бағыттарының біріне айналды. Осыған байланысты мемлекеттеріміздің құрметті президенттері Өңірлер басшылары кеңесін құру туралы шешім қабылдады. Өңірлік деңгейдегі тікелей байланыстар өзбек-қазақ қатынастарын одан әрі нығайтуға қуатты серпін беретініне»,
— деп атап өтті Абдулла Арипов.
Қазақстанның Маңғыстау, Ақтөбе, Қызылорда және Түркістан облыстары Өзбекстан құрамына кіретін Қарақалпақстанмен, сондай-ақ Жызақ, Науаи, Сырдария, Ташкент облыстарымен шектеседі. Екі ел арасындағы мемлекеттік шекараның жалпы ұзындығы шамамен 2,3 мың шақырымды құрайды.
Олжас Бектенов «Орталық Азия» халықаралық өнеркәсіптік кооперация орталығын толыққанды іске қосудың және оны өзара тиімді әрі бәсекеге қабілетті жобалармен толықтырудың маңыздылығын атап өтті. Сауда-инвестициялық ынтымақтастықты одан әрі кеңейту үшін заманауи көлік-логистикалық инфрақұрылымды дамыту қажеттілігі атап өтілді. Қазақстан мен Өзбекстан Еуразия кіндігінде, стратегиялық маңызы бар негізгі көлік бағыттарының торабында орналасқандықтан айтарлықтай әлеуетке ие.
Солтүстік – Оңтүстік бағыттарымен және Трансауған дәлізімен ұштасатын Транскаспий халықаралық көлік бағытының маңызы ерекше атап өтілді.
Өткен жылдың қорытындысы бойынша Ақтау және Құрық теңіз порттары арқылы жүк тиеу-жөнелту көлемі 8 млн тоннаны құрады. Осы жылдың бірінші жартыжылдығында Қазақстан Республикасының порттары арқылы контейнерлік тасымалдау көлемі 5%-ға артып, 50 мың ЖФЭ-ден асты.
Сондай-ақ Қазақстан мен Өзбекстан арасындағы туристік ынтымақтастықты дамыту әлеуетіне назар аударылды, оның ішінде екі ел азаматтарының тарихи-мәдени орталықтарға баруға деген қызығушылығының артып келе жатқаны атап өтілді.
Пленарлық отырыста Маңғыстау және Түркістан облыстарының әкімдері Нұрдәулет Қилыбай мен Нұралхан Көшеров, Шымкент қаласы әкімінің орынбасары Арман Сәбитов, сондай-ақ Жызақ, Сырдария және Ташкент облыстарының әкімдері – Улугбек Мустафоев, Эркинжон Турдимов, Зойир Мирзаев баяндама жасады. Сонымен қатар іс-шараға екі елдің 300-ден астам кәсіпкері қатысты.
Жиын қорытындысы бойынша Қазақстан мен Өзбекстан өңірлері арасында бірқатар меморандумға, сондай-ақ жалпы сомасы 80 млрд теңгеден астам коммерциялық құжаттарға қол қойылды. Жаңа уағдаластықтар бауырлас елдер мен шекара маңы байланыстарын нығайтуға, бірлескен жобаларды жүзеге асыруға және Орталық Азияның орнықты экономикалық дамуына ықпал етуі тиіс.
Қазақстан Республикасының Премьер-министрі Олжас Бектенов пен Өзбекстан Республикасының Премьер-министрі Абдулла Арипов Ақтауда Екіжақты ынтымақтастық жөніндегі бірлескен үкіметаралық комиссияның 23-ші отырысын өткізді.
Шағын құрамдағы кездесуде жоғары деңгейде қол жеткізілген уағдаластықтардың жүзеге асырылу барысы қаралып, алдағы жұмыстың басым бағыттары талқыланды.
«Мемлекет басшылары Қасым-Жомарт Кемелұлы Тоқаев пен Шавкат Миромонович Мирзиёевтің бірлескен күш-жігерінің арқасында біздің көпқырлы байланыстарымыз қарқынды дамып келеді және бүкіл Орталық Азия өңіріндегі өзара іс-қимылдың табысты үлгісіне айналды. Өткен жылдың қараша айында Қазақстан Республикасы Президентінің Өзбекстанға мемлекеттік сапарының қорытындысы қазақ-өзбек серіктестігінің сенім рухындағы сипатын тағы бір айқындап берді»,
— деп атап өтті Олжас Бектенов.
«Биыл мемлекеттеріміздің басшылары Бұхара, Астана және Түркістан қалаларында өткен кездесулері аясында екі елдің үкіметтеріне ынтымақтастықты кеңейту жөнінде нақты міндеттер жүктеді. Аталған тапсырмаларды орындау мақсатында барлық қажетті шараларды қабылдауға дайынбыз. Біздің бүгінгі келіссөздер сауда, инвестиция, өнеркәсіп, көлік, өңіраралық және мәдени-гуманитарлық ынтымақтастықты одан әрі дамытуға ықпал ететініне сенімдімін»,
— деп атап өтті Абдулла Арипов.
2025 жылдың қорытындысы бойынша екіжақты сауда көлемі $4,8 млрд-ты құрады. 2026 жылдың алғашқы бес айында Қазақстан мен Өзбекстан арасындағы тауар айналымы 37%-ға артып, $2,3 млрд-қа жетті. Қазақстанның экспорттық әлеуеті металлургия, машина жасау, мұнай химиясы, химия өнеркәсібі, фармацевтика, көлік құралдары мен құрылыс материалдары өндіру салаларында айқын байқалады. Олжас Бектенов инвестициялар және сауда саласындағы жалпы құны $7,8 млрд құрайтын жол картасын сапалы жүзеге асырудың маңыздылығын атап өтті. Оған енгізілген жобалар бойынша бірлескен жұмыс тауар айналымын әртараптандыру, өзара жеткізілімдерді кеңейту және жаңа инвестициялар тартуды қамтамасыз етеді.
Ынтымақтастықтың негізгі бағыттарының бірі – өнеркәсіптік кооперация. Қазіргі таңда Қазақстан мен Өзбекстан жалпы құны $1,8 млрд-тан асатын 80 бірлескен жобаны жүзеге асыру бойынша жұмыс жүргізуде. Құны $227 млн-ды құрайтын 15 жоба іске қосылып, 5 мыңға жуық жұмыс орны ашылды. Бүгінде жалпы сомасы $102 млн болатын 6 жоба белсенді жүзеге асыру кезеңінде. Сонымен қатар құны $1,5 млрд-ты құрайтын келешегі зор 59 бастаманы жүзеге асыру мәселесі пысықталуда.
Көлік қатынасы және логистикалық дәліздерді дамыту мәселелері қаралды. 2025 жылдың қорытындысы бойынша Қазақстан мен Өзбекстан арасындағы теміржол тасымалының көлемі 16%-ға өсіп, 32,3 млн тоннаны құрады. Тасымалдарды одан әрі ұлғайту үшін теміржол дәліздерінің өткізу қабілетін 35 млн тоннадан 60 млн тоннаға дейін арттыру жөніндегі бірлескен іс-шаралар жоспары әзірленді. ҚР Премьер-министрі Олжас Бектенов Орталық Азия елдерімен көлік байланыстарын кеңейту үшін теміржол инфрақұрылымын одан әрі дамытудың маңыздылығын атап өтті. Осыған байланысты іргелес теміржол учаскелерін жаңғырту және қосымша өткізу пункттерін ашу мүмкіндігін қарастыру ұсынылды.
Қазақстандық теңіз инфрақұрылымын пайдалануда оң динамика байқалады. Автомобиль тасымалы саласындағы ынтымақтастық дамуда.E-Permit жүйесінде шетелдік рұқсат бланкілерімен электрондық алмасу тетігінің енгізілуі төрт жыл ішінде олардың санын он еседен астам арттыруға және мемлекеттік шекарадан өту уақытын 9 сағаттан 30 минутқа дейін қысқартуға мүмкіндік берді.
Су шаруашылығы саласында өзара түсіністік пен екі елдің мүдделерін есепке алу негізінде ынтымақтастықты дамытуға дайын екендігі расталды.
Тараптар сондай-ақ мәдени-гуманитарлық байланыстарды дамытудың маңыздылығын атап өтті. Бүгінгі таңда Қазақстан мен Өзбекстанның тарихи-мәдени нысандарын ЮНЕСКО-ның Бүкіләлемдік мұра тізіміне енгізу үшін «Ұлы Жібек жолы: Ферғана–Сырдария дәлізі» трансұлттық номинациясына қосу бойынша бірлескен жұмыс жалғасуда.
Экономиканың дамуы жұмыспен қамту мен халықтың табысының өсуімен қатар жүреді. 2026 жылдың басынан бері Маңғыстау облысында 9 мыңнан астам жұмыс орны ашылды. Оның 3 780-і тұрақты, тағы 5 367-сі уақытша.
Бірінші тоқсанның қорытындысы бойынша жұмыссыздық деңгейі бір жыл бұрынғы 5,1%-ға қарағанда 5%-ға дейін төмендеді.
Орташа айлық жалақы 6,2%-ға артып, 660 мың теңгеге жуықтады. 2025 жылдың осы кезеңінде шамамен 622 мың теңгені құрады.
Маңғыстау облысының қолайлы географиялық жағдайы және теңіз порттарының болуы оның транзиттік тасымалдарды дамытудағы ерекше рөлін айқындайды. Теңіз және құрлық дәліздері арқылы жүк тасымалы көлемінің ұлғаюы нәтижесінде көлік қызметтері 8,5%-ға өсіп, 272,6 млрд теңгені құрады.
Порт инфрақұрылымының жүктемесін одан әрі арттыру, Транскаспий халықаралық көлік бағытын дамыту және теміржол, автомобиль мен теңіз тасымалдары арасындағы байланыстарды нығайту айрықша маңызға ие.
Ішкі саудада да оң көрсеткіштер байқалды. Оның айналымы 500 млрд теңгеге жетіп, нақты мәнде 3,3%-ға өсті. Ауыл шаруашылығының жалпы өнімінің көлемі 17,8 млрд теңгені құрады. Өткен жылдың бірінші жартыжылдығымен салыстырғанда көрсеткіш 1,9%-ға өсті.
Маңғыстау облысының өнеркәсіп кәсіпорындары жыл басынан бері 2,1 трлн теңгеге өнім өндіріп, 3,6%-ға нақты өсім көрсетті. Өнеркәсіп өндірісінің құрылымында негізгі өзгерістер байқалуда: дәстүрлі өндіруші салалармен қатар өңдеу өнеркәсібі озық өсім қарқынын көрсетті. Биылғы қаңтар–маусым айларында өңдеу өнеркәсібінде өндірілген өнім көлемі 39%-ға артып, 186 млрд теңгеге жетті. Бұл көрсеткіштер шикізаттық емес сектордың дәйекті түрде кеңейіп келе жатқанын және қосылған құны жоғары өнім өндірісінің артып отырғанын айқын көрсетеді. Оң серпін инвестиция саласында да сақталуда. Алты айдың қорытындысы бойынша негізгі капиталға салынған инвестиция көлемі шамамен 500 млрд теңгені құрады.
Өнеркәсіптік және көлік инфрақұрылымының дамуы өңірдің құрылыс кешенінің қарқынды жұмысына серпін беруде. Нәтижесінде орындалған құрылыс жұмыстарының көлемі 11,8%-ға өсіп, 178,3 млрд теңгені құрады.
Өңірде тұрғын үй құрылысы да қарқынды жалғасуда. Жыл басынан бері 275 мың шаршы метр тұрғын үй пайдалануға берілді. Бұл өткен жылдың сәйкес кезеңімен салыстырғанда 4,6%-ға жоғары. Тұрғын үй қорының ұлғаюы халықтың тұрмыс сапасын жақсартып, қалалық инфрақұрылымның одан әрі дамуына ықпал етуде.