Маңғыстауда «Tour de Bozjyra» велошеруі өз мәресіне жетті

Маңғыстау облысында екі күнге созылған «Tour de Bozjyra» велошеруі аяқталды. Бүгін 40-қа жуық велоспортшы «Маңғыстау арена» спорт кешенінен «TetysBlu» тақырыптық саябағына дейінгі 35 шақырымдық қашықтықты жүріп өтті, деп хабарлайды Қоғамдық коммуникация орталығы.

Велошеруді ұйымдастырушы Мадина Қыдырбаеваның айтуынша, шараға еліміздің түкпір-түкпірінен келген әуесқой және кәсіби спортшылар қатысқан.

— Басты мақсатымыз — Маңғыстау облысында спорт пен туризмді дамыту. Бұл спорт түрі аймақта әлі кеңінен дамымағандықтан, осындай велошерулер арқылы оны ілгерілетуді көздеп отырмыз. Болашақта бұл шараны халықаралық деңгейге шығару жоспарда бар, — деді Мадина Қыдырбаева.

«Tour de Bozjyra» велошеруі соңғы үш жыл қатарынан дәстүрлі түрде ұйымдастырылып келеді. Сол уақыт бойы үзбей қатысып жүрген спортшы Дмитрий Казаков мұндай шаралардың жиі өткізіліп тұрғанын қалайды.

— Жасым 37-де. Велоспортпен айналысқаныма жеті жыл болды. Бұл мен үшін қызықты. Жарыстарға да, велошерулерге де тұрақты қатысып келемін. Осындай шаралар тәжірибе жинауға, бір-бірімізден үйренуге, әрі орта қалыптастыруға мүмкіндік береді. Сонымен қатар, бұл өңірімізге туристерді көбірек тартуға сеп болмақ, — дейді Дмитрий Казаков.

Айта кетейік, велошерудің алғашқы күні 72 спортшы Жаңаөзен қаласынан Бозжыраға дейінгі 130 шақырымдық жолды жүріп өткен болатын.