«Кендірлі» су тұщыту зауыты Жаңаөзен тұрғындарын сапалы ауыз сумен қамтамасыз етіп отыр
«Кендірлі» су тұщыту зауыты Жаңаөзен тұрғындарын сапалы ауыз сумен қамтамасыз етіп отыр
Маңғыстау облысында биыл сәуір айында іске қосылған «Кендірлі» су тұщыту зауыты тәулігіне 50 мың текше метрге дейін теңіз суын тұщытуға қауқарлы. Мемлекет басшысының тапсырмасымен «ҚазМұнайГаз» ұлттық компаниясы жүзеге асырған жоба Жаңаөзен қаласы мен оған іргелес елді мекендерді сапалы ауыз сумен тұрақты қамтамасыз етуге мүмкіндік берді, деп хабарлайды Қоғамдық коммуникация орталығы.
Теңіз суын тұщытуға арналған кәсіпорын Қазақстандағы осы бағыттағы ірі жобалардың бірі саналады. Зауыттың технологиялық кешені кері осмос қондырғылары орнатылған су тұщыту, тұзсыздандыру және минералдандыру цехтарынан тұрады. Зауыт толық автоматтандырылған жүйеде жұмыс жасайды.
Зауыттың бас директоры Мақсат Ибағаровтың айтуынша, қазіргі таңда зауыт жобалық қуатында жұмыс істеп тұр. Айта кету керек, жоба бойынша зауыт екі режимде жұмыс істеуге есептелген: 50% жүктемеде, яғни тәулігіне 25 мың текшеметр және 100% жүктемеде тәулігіне 50 мың текшеметр.
-Зауыт қазіргі таңда жобалық қуатымен жұмыс істеп тұр. Теңіз жағалауынан 730 метр қашықтықта орналасқан су алу құрылғылары арқылы 11 метр тереңдіктен теңіз суы арнайы диаметрі 1400 миллиметр болатын екі құбырмен алынады. Өндірістік процестің барлығы автоматтандырылған жүйе арқылы бақыланады. Судың сапасына тұрақты түрде зертханалық сараптама жүргізіледі. Тұщыту процесінен кейін ауыз суға қажетті пайдалы минералдар қосылып, дайын су Жаңаөзен қаласының тұрғындарына жеткізіледі. Қазіргі таңда су тапшылығы жоқ, халыққа су үздіксіз беріліп отыр, - деді Мақсат Ибағаров.
Зауытта тұрақты түрде 88 адам еңбек етеді. Қызметкерлердің басым бөлігі - Маңғыстау өңірінің тұрғындары. Кәсіпорын мамандарының кәсіби біліктілігін арттыруға да ерекше мән беріледі. Инженерлік-техникалық қызметкерлер тұрақты түрде оқытылып, өндірісте қолданылатын заманауи технологиялар мен жабдықтарды пайдалану бойынша білімдерін жетілдіріп отырады.
Жоба аясында зауыттан Жаңаөзен қаласына дейін магистральдық су құбыры тартылды. Сонымен қатар нысанның тұрақты жұмысын қамтамасыз ету үшін электр беру желілері, талшықты-оптикалық байланыс желісі, газ құбыры және басқа да коммуникациялар салынды.
Кәсіпорында Еуропа, АҚШ, Түркия, Жапония, Ресей және Қытайдың жетекші өндірушілерінің заманауи технологиялық жабдықтары орнатылған. Зауыттың өндірістік қауіпсіздігі мен технологиялық процестерді бақылауға арналған заманауи техникалық құралдар да қарастырылған. Атап айтқанда, кәсіпорын аумағында қызметкерлердің қозғалысына арналған электр көліктері, теңіздегі жұмыстарды жүргізуге арналған қайық және суасты жұмыстарын бақылауға мүмкіндік беретін арнайы дрон қолданылады.
«Кендірлі» су тұщыту зауытының іске қосылуы - Маңғыстау өңіріндегі су тапшылығын азайтуға бағытталған маңызды қадам. Кәсіпорынның жобалық қуаты тәулігіне 50 мың текше метрге дейін ауыз су өндіруге мүмкіндік береді. Бұл өз кезегінде Жаңаөзен қаласы мен оған жақын елді мекендердің тұрғындарын тұрақты әрі сапалы ауыз сумен қамтуға жағдай жасап отыр.