2026 жылдың 11 наурызында Қазақстан Республикасы Еңбек және халықты әлеуметтік қорғау министрлігінің Мемлекеттік еңбек инспекциясы комитетінің Маңғыстау облысы бойынша департаменті Еңбек тәуекелдері картасында жоғары тәуекел дәрежесіне енгізілген кәсіпорындармен түсіндіру жұмыстарын жүргізу мақсатында мекемелермен жиналыс өткізді.

Бүгінгі таңда аталған жүйеде Маңғыстау облысы бойынша 72 кәсіпорын жоғары тәуекел дәрежесінде тіркелген. Бұл кәсіпорындарда міндетті зейнетақы жарналары төленетін жұмыскерлер санының азаюы, еңбек шарттары мен міндетті зейнетақы жарналары арасындағы айырмашылық, міндетті әлеуметтік медициналық сақтандыру жарналарының, әлеуметтік аударымдардың, міндетті зейнетақы жарналарының және жалақының уақытылы аударылмауы немесе кешіктірілуі сияқты тәуекел факторлары анықталған.

Жиналыс барысында Қазақстан Республикасының еңбек заңнамасының талаптары түсіндіріліп, қызметкерлердің еңбекақысын және басқа да міндетті әлеуметтік төлемдерді уақытылы төлеудің маңыздылығы айтылды.

Іс-шараның мақсаты – еңбек заңнамасының сақталуын қамтамасыз ету және еңбек дауларының туындау тәуекелдерінің алдын алу.