Меню
Страницы
Все материалы
27 сентября 2021
Маңғыстау облысында құрылыс қалдықтарына арналған полигон ашу жоспарлануда
Маңғыстау облысының әкімі Нұрлан Ноғаевқа қатты тұрмыстық қалдықтар (ҚТҚ) полигонын қайта құру жобасы таныстырылды, деп хабарлайды Маңғыстау облысы әкімінің баспасөз қызметі.
22 қыркүйекте Маңғыстау облысына келген сапары барысында Президент Қасым-Жомарт Тоқаев облыстың әлеуметтік-экономикалық дамуы жөніндегі кеңесте жергілікті экологиялық проблемалар жөнінде айтқан болатын. Мемлекет басшысы Үкіметке және облыс әкімдігіне үш жыл ішінде қатты тұрмыстық қалдықтарды жинау, сұрыптау және қайта өңдеудің тұтас инфрақұрылымын құруды, сондай-ақ полигондарды нормативтік талаптарға сай етіп жасақтауды тапсырды.
Бүгінде Мұнайлы ауданының Баянды ауылында полигонды қайта құрудың екінші кезеңі жүргізілуде. Ал жалпы ауданы 25 гектар болатын алты шұңқырлы полигон 2015 жылы іске қосылған болатын. Содан бері Ақтау қаласы мен Мұнайлы ауданының барлық қатты тұрмыстық қалдықтары осында тасымалдануда. Полигонда техника мен қажетті құрал-жабдықтардың жетіспеушілігінен болашақта өңірге елеулі эпидемиологиялық қауіп тууы мүмкін. Сондықтан, қазіргі уақытта негізгі міндет сұрыптау желілерін орнату болып отыр.
Бұдан басқа, жауапты азаматтар Нұрлан Ноғаевқа өңір республикада құрылыс салу бойынша көшбасшылар қатарында болғандықтан құрылыс қалдықтарының көп мөлшерде жиналатындығын да баяндады.
"Маңғыстау облысында құрылыстың белсенді жүруіне байланысты Мұнайлы ауданында құрылыс қалдықтарын жинау және өңдеу алаңын ашу жоспарлануда. Өңірде ҚТҚ жинаумен және шығарумен 21 ұйым айналысады. Облыс бойынша қоқысты сақтауға арналған 12 мыңнан астам контейнер бар. Тағы 17 мың қоқыс жәшігі қажет", - деді Маңғыстау облысының Табиғи ресурстар және табиғат пайдалануды реттеу басқармасының басшысы Дүйсен Құсбеков.
Қазіргі уақытта құрылыс қалдықтарын жинап, қайта өңдейтін кәсіпкерлермен келіссөздер жүргізілуде. Кездесу қорытындысы бойынша Нұрлан Ноғаев жауапты тұлғаларға бірқатар нақты тапсырмалар берді.
18 сентября 2021
Дүниежүзілік тазалық күні: Маңғыстаулықтар бүкіләлемдік сенбілікке белсенді қатысты
Бүгін сенбінің таңы атысымен маңғыстаулықтар экологиялық жағдайға немқұрайлы қарамайтынын дәлелдеп, мыңдаған адам ұйымшылдықпен сенбілікке шықты.
Маңғыстау облыстық табиғи ресурстар және табиғат пайдалануды реттеу басқармасының және облыстық экология департаментінің қызметкерлері, отбасы мүшелерімен дүниежүзілік науқанға қатысып, қоқыстар үйіліп жиналып қалған аумақтарды тазалады. Тұрмыстық қалдықтар, құрылыс және басқа да қоқыстар қаптарға жиналып, полигонға жіберілді.
"Каспий теңізінің жағалауы адамдар ең жиі баратын орынның бірі болып табылады және оның айналасын таза ұстау - бұл әрбір қала тұрғынының міндеті. Жалпы баршамыз қоршаған ортаны қорғауға үлкен көңіл бөлуіміз қажет. Мәселен, табиғат жанашырлары қала шегінде «Өлі көл» (Кіші Оймаша көлі) аумағы мен басқа да аумақтарды қоқыс үйіндісін жинауға бір кісідей атсалысты. Акцияға қатысқандардың ішінен мемлекеттік қызметшілер, еріктілер және қоршаған қортаға бей-жай қарамайтын тұрғындарды ерекше атауға болады", - деді өз сөзінде Маңғыстау облыстық табиғи ресурстар және табиғат пайдалануды реттеу басқармасының басшысы Дүйсен Құсбеков.
Сенбілікке қатысушылардың барлығы жеке қорғаныс құралдарымен, соның ішінде антисептиктермен, қолғаптармен, маскалармен, қоқысқа арналған арнайы пакеттермен қамтамасыз етілді. Жиналған қоқыс көлемі жүз тоннадан асты. Әсіресе шыны, пластик, резеңке, тонна-тонна қағаздар, автошиналар, құрылыс материалдары көп кездесті. Белсенді қатысушылар арасында үкіметтік емес және қоғамдық ұйымдардың өкілдері бар: «Эко Маңғыстау», «Маңғыстау табиғаты», «Еcojer» қауымдастығы, «Невада-Семей» қозғалысы, «Табиғи орта». Сондай-ақ "Yessenov University" студенттері мен Ақтау қаласындағы химия-биология бағытындағы Назарбаев Зияткерлік мектебінің оқушылары, қарапайым тұрғындар да аз болмады.
«Миллиондаған адамдар жыл сайын «Дүниежүзілік тазалық күні» азаматтық акциясына қатысады, оның идеясы Эстонияда пайда болды. 14 жыл бойы әлемнің 180 елінде қоғамдық және қорық орындарын қоқыстан тазарту бойынша іс-шаралар өткізіліп келеді. Дүниежүзілік тазалық күні - бұл елдің әлемді қалай өзгерте алатындығының мысалы. Барлығы адамзаттың қолында. Біздің әрқайсымыз әлемді жақсы жаққа өзгерткіміз келеді. Ең бастысы ұмтылыс бар. Шетте қалмай, бізді қолдауға келгендердің барлығына алғыс айтамыз», - деді Маңғыстау облысы экология департаментінің басшысы Руслан Төкенов.
Науқанның негізгі міндеттерінің бірі – жұртшылықтың барынша назарын қоршаған ортаны қалдықтармен ластау мәселесіне, қоқысты бөлек жинау мен қайта өңдеуге, экологиялық өмір салтына, дербес экологиялық ізді азайтуға және тұрақты дамуға аудару болып табылады.
Дүниежүзілік тазалық күні іс-шарасы 14 жыл бойы қатарынан өткізіліп келеді. 2008 жылы эстониялықтар бастаған науқанға Қазақстанды қоса алғанда, шамамен 180 ел қатысуда. Айта кету керек, бұл шаралар #Birge #TazaQazaqstan республикалық экологиялық қозғалысы аясында өткізіліп келеді.
15 сентября 2021
Маңғыстау облысында «World cleanup Day» бүкіләлемдік акциясы өтеді
Маңғыстау облыстық табиғи ресурстар және табиғат пайдалануды реттеу басқармасы осы сенбі күні (18.09.2021ж.) өтетін дүниежүзілік «World cleanup Day» тазалық акциясына барша тұрғындарды белсенді қатысуға шақырады.
Бірлесіп заңсыз қоқыс төгілген үйінділерді анықтап жоюға, қоқыстарды қайта сұрыптауға, аумақтарды тазалауға бір кісідей атсалысуға болады. Айта кету керек, "Дүниежүзілік тазалық күні" қоршаған ортанының ластануына және экологиялық ахуалдың жай-күйіне бей-жай қарамайтын табиғат жанашырларын біріктіріп қана қоймайды, сонымен қатар ұжымдық таныту арқылы өңірдің санитарлық ахуалын жақсарту мен одан әрі көріктендіруге септігін тигізбек. Осылайша аймақтың тазалығына барлық тұрғындар мен қонақтар өздерінің үлесін қоса алады!
02 сентября 2021
Экологиялық мәселелер – қоғамдық бақылауда
Бүгін «Nur Otan» партиясы Маңғыстау облыстық филиалының алаңында филиал жанындағы қоғамдық экологиялық кеңесінің, «Атамекен» облыстық кәсіпкерлер палатасының, «Ecojer» қауымдастығының Маңғыстау облысы бойынша өңірлік экологиялық кеңесінің және «Табиғи орта» Батыс Қазақстан өңірлік ассоциациясының бірлескен отырысы өтті.
Күн тәртібінде 2020 жылдың аяғында Қазақстан Республикасы Экология, геология және табиғи ресурстар министрі Мағзұм Мырзағалиевтің келісуімен Маңғыстау облысының әкімі Серікбай Трұмов бекіткен облыстың экологиялық мәселелерін кешенді шешу бойынша Жол картасының орындалу барысы туралы орындаушылардың (қалалар мен аудандар әкімдіктері, облыстық басқармалар мен департаменттер) мәлімдемелері тыңдалды. Айта кету керек, күн тәртібінің тақырыбы өзекті болғандықтан, отырысқа бизнес-қоғамдастық пен үкіметтік емес ұйымдарының өкілдері және қоғам белсенділері онлайн форматында қатысты.
Уақыт үнемдеу мақсатында, Жол картасының негізгі орындаушылары ретінде Маңғыстау облысы табиғи ресурстар және табиғат пайдалануды реттеу басқармасының басшысы Дүйсен Құсбеков пен облыстық экология департаментінің басшысы Руслан Төкенов, Жол картасының 36 бабының әрқайсысына жеке тоқталмай, 8 тарау бойынша әр тараудың орындалысы туралы шолу жасады.
Атап айтқанда, шенеуніктер елді мекендердің көгалдандырылуы мен Қошқарата улы көлінің айналасына жасыл желек егу, осы улы көлдің рекультивациясы, облыс аумағындағы санитарлық жағдай, жер ресурстарының тарихи ластануы, ауыз су тапшылығы және т. с. с. мәселелерді шешу бойынша атқарылып жатқан жұмыстар туралы баяндады.
Дегенмен, осы жұмыстар нәтижелерінің нақты көрсеткіштеріне толықтай көз жеткізу үшін бір ғана отырыс жеткіліксіз екендігі белгілі. Сондықтан, осы отырыстың төрағасы ретінде келесі жылдың қаңтар айында, яғни шенеуніктердіңі қолдары бостау кезінде, Жол картасының әр бабы бойынша нақты қанша қаражат қарастырылып, оның қандай мөлшері игерілді, іс жүзінде қандай нәтижеге қол жеткізілді, яғни іс-шаралар орындалысының толық есебін алу мақсатында қатарынан бірнеше отырыс өткізуді ұсындым.
Отырысқа онлайн режимінде қатысқан «Атамекен» облыстық кәсіпкерлер палатасының директоры, «Ecojer» қауымдастығының Маңғыстау облысы бойынша өңірлік экологиялық кеңесінің қосалқы төрағасы Рашит Мұстапаев Жол картасы қоғамдық бақылауға алынғандығы жөнінде ҚР Экология, геология және табиғи ресурстар министрі Мағзұм Мырзағалиев пен облыс әкімі Серікбай Трұмовқа, осы отырыстың хаттамасын жалғап, ресми хат жолдауды ұсынды.
Іс-шараға және бір онлайн қатысушы, Қазақстан тәжірибеші экологтары қауымдастығының төрайымы Лаура Маликова да бірқатар ұсыныстарын білдірді.
«Nur Otan» партиясы Маңғыстау облыстық филиалы жанындағы қоғамдық экологиялық кеңес мүшесі, Маңғышлақ эксперименталды ботаникалық бағының бас директоры Ақжүніс Иманбаева 2000-шы жылдары мемлекет тарапынан қаржы бөлініп, облыс аумағында бірқатар жерасты су ұңғымалары жабылып қалғанын сынға алып, соңғы жылдардағы қуаңшылық жағдайы сол сауатсыз әрекеттің салдарынан болуы мүмкін деген ойын жеткізді. Өз сөзіне дәлелдеме ретінде сарапшы сол ұңғымалар жабылмастан бұрынғы және жабылғаннан кейінгі өсімдік жамылғысының жай-күйін мысал келтірді. Яғни, жер бетіндегі судың азаюы биолауантүрліліктің жағдайына кері әсерін тигізгендігі сөзсіз.
Қоғамдық экологиялық кеңестің және бір мүшесі, облыстық мәслихат депутаты Гүлнар Тасболатова Мұнайлы ауданындағы тұрмыстық қатты қалдықтар полигонының шешілмей жатқан мәселелеріне отырысқа қатысушылардың назарын аударды. Халық қалаулысының айтуынша, егер бюджеттен тиісті қаржы бөлінетін болса, халық саны жағынан еліміздегі ең үлкен ауданда қоқыс мәселесі шешімін табар еді.
Сонымен қатар, жылдар бойы ушығып тұрған Қошқарата көлін рекультивациялау және Шетпе ауылының маңындағы тас каръерлерінің ауаны шаңмен ластауы мәселелеріне де қоғам белсенділері тарапынан назар аударылып, нақты шаралар қолдану жөнінде халық атынан мемлекететтік органдарға талап қойылды.
Өз кезегімде, Ақтау қаласының іргесінде орналасқан, құстың Қызыл кітапқа енген 22 түрі мекендейтін Қаракөл көлінің мәселелері де жылдар бойы шешімін таба алмай жүргендігін Орта Азия Рамсар өңірлік бастамасы үйлестіру комитеті төрағасының орынбасары ретінде қозғағым келеді. Халықаралық мәні бар сулы-батпақты алқаптардың Рамсар тізіміне енуге лайықты Қаракөл туралы ҚР Президенті Қасым-Жомарт Тоқаевтің атына 2020 жылдың күзінде хат жолданып, тиісті қолдау көрсетілетіні жөнінде облыстық табиғи ресурстар және табиғат пайдалануды реттеу басқармасынан жауап келгеніне қарамастан, әлі күнге дейін нақты қолдау жасалып жатқан жоқ.
27 августа 2021
Жаңаөзен аумағында 38 заңсыз қоқыс төгілген нүкте анықталды
Маңғыстау облысында заңсыз төгілген үйінділерді анықтау және санитарлық тазарту жұмыстары жалғасуда. «Қазақстан Ғарыш Сапары» ҰК» АҚ дерегі бойынша жыл басынан бері ғарыштық бақылаудың көмегімен аймақта 141 рұқсат етілмеген жерге қоқыс төгу фактісі анықталған.
Жергілікті атқарушы органдар қазіргі уақытта тұрмыстық қатты қалдықтар төгілген 108 нүктені тазалаған. Билік өкілдері экологтармен бірге заңсыз төгілген үйінділерді тазалап үлгермей жатқанда, өкінішке орай, жаңадан қоқыс төгілген орындар пайда болуда.
Спутник көмегімен заңсыз полигондарды суретке түсіру тәжірибесі 2018 жылдан бері қолға алынған. Мәселен, биылдың өзінде анықталған заңсыз қоқыс алаңының үштен бірі Жаңаөзен аумағынан табылып отыр, атап айтқанда 38 нүкте бар. Әзірге оның тек екеуі ғана «ӨзенМұнайГаз» АҚ көмегімен тазартылған.
Жаңаөзен қаласында бір аптаның ішінде барлық рұқсат етілмеген қоқыс алаңдары жойылуы тиіс. Қала маңында рұқсат етілмеген 36 нүкте әлі тазаланбаған. Қоқыс үйінділері тазаланбаған жағдайда Маңғыстау облысының экология департаменті Жаңаөзен қаласы әкімдігіне айыппұл салуға мәжбүр болады.
Өз кезегінде Жаңаөзен қаласы әкімінің орынбасары Берік Ізғалиев жақын арада заңсыз қоқыс төгілген жерлер тазартылады деп сендірді. Қазіргі уақытта ауыр техникасы бар кәсіпорындармен келіссөздер жүргізілуде.
«Өңірде стихиялық қоқыс үйінділерін тазарту бойынша айлық өтіп жатыр. Рұқсат етілмеген полигондардың орналасқан жерлерін анықтау және жою жұмыстары аясында біздің экологтардың, облыстық табиғи ресурстар және табиғатты пайдалануды реттеу басқармасының, жергілікті полиция қызметінің, Ақтау қаласы әкімдігінің тұрғын-үй коммуналдық шаруашылық бөлімі өкілдерінің қатысуымен рейдтік іс-шаралар жүргізілді. Бұл жұмыстар алдағы уақытта да жалғасын таба береді», - деді облыстық экология департаменті басшысының міндетін атқарушы Сағдат Хансейітов.
Маңғыстау облысы табиғи ресурстар және табиғат пайдалануды реттеу басқармасы басшысының орынбасары Есенқос Әділбаев, тұрғындар арасында экологиялық мәдениетті қалыптастыру өзектілігін жоғалтпағанын айтады. Әсіресе әрбір тұрғын қалдықтарды бөлек жинаудың маңыздылығын және санитарлық ережелерді сақтауды әрдайым есте сақтау ауадай қажет деген пікірде.
«Өздігінен көрінген жерге қоқыс тастау дұрыс емес. Мұндай деректерді анықтау оңайға соқпайды, себебі басым бөлігі қоқысты түнгі мезгілде шаһардың сыртына апарып тастайды. Осылайша заңсыз қоқыс полигондары көбейіп отыр, олар өздігінен пайда болмайды. Жалпы кімде-кім тазалық мәселесіне жауапкершілікпен қарағаны абзал», - дейді Есенқос Естөреұлы.
Белгілі эколог Әділбек Қозыбақов бұған дейін құқық қорғау органдары рұқсат етілмеген жерге қоқыс тастағандарға қатысты жазаны қатаңдату қажеттігі туралы бірнеше рет жазған болатын. Яғни, қоқыс үйіндісін көбейтіп жүргендер әділ жазасын алуы керек. Бұл ретте полицейлер үлкен рөл атқара алады, өйткені осындай заңсыз әрекетке баратындардың басым бөлігі жеке тұлғалар, ал оларды жауапкершілікке тарту тек тәртіп сақшыларының ғана құзыретіне кіреді.
Жаңаөзен қаласы әкімінің орынбасары Берік Ізғалиевтің айтуынша, экология мәселелері әкімдіктің жұмысындағы басым бағыттардың бірі болып табылады. Мәселен, жақында Жаңаөзен шаһарында қалдықтарды сатып алатын алғашқы эко-пункт ашылған. Кәсіпкер күніне жергілікті тұрғындардан бір тоннаға жуық қоқыс сатып алады екен. Ал, эко-пунктке келушілердің дені балалар мен жасөспірімдер. Осылайша олар еңбек етуге үйренеді және табыс табуға мүмкіндігі бар. Алғашқы айдың өзінде эко-пункт тұрғындардан 15 тоннаға жуық қоқыс сатып алған. Макулатураның әр келісі 20 теңге болса, алюминий банкілер 80 теңгеден қабылданады.
Берік Ізғалиевтің сөзінше, эко-пункт қалада қоқыс көлемін азайтуға және таза ұстауға азда болса көмегін тигізуде. Алдын-ала талдау жүргізілген. Тапсырылған 15 тонна қалдықтың жартысы картон қораптар, 37% пластик және 13% алюминий банкілер. Кәсіпкер қазірдің өзінде қалдықтарды өңдейтін зауыттармен ынтымақтастық орнату бағытында жұмыстанып жатқан көрінеді. Сонымен қатар, болашақта қоқыс үйінділерін болдырмау мақсатында әкімдік инвесторлармен келіссөздер жүргізбекші, яғни инвестиция салғысы келетін кәсіпкерлік субъектілерін қолдау үшін әкімдік тарапы жер телімін беруге және басқа да сұрақтар бойынша қолдау көрсетуге дайын.
27 августа 2021
«Каспий теңізінің бірегей табиғаты» тақырыбындағы балалар арасындағы шығармашылық қолөнер байқауының жеңімпазы мен жүлдегерлерінің есімдері белгілі болды.
Бүгін «Каспий теңізінің бірегей табиғаты» тақырыбындағы балалар арасындағы шығармашылық қолөнер байқауының жеңімпазы мен жүлдегерлері марапатталды.
Байқау 2021 жылдың 13-18 тамызы аралығында өткен болатын. Маңғыстау облысы табиғи ресурстар және табиғат пайдалануды реттеу басқармасы басшысының орынбасары Есенқос Әділбаев байқау қорытындысын жариялап, облыстық отбасылық үлгідегі балалар ауылының тәрбиеленушілеріне алғыс хаттар мен бағалы сыйлықтар табыс етті.
Мәселен, 11-сынып оқушысы Әділет Бердібай байқаудың жеңімпаз деп танылды, оған "Samsung" маркалы ұялы телефон табыс етілді. Екінші орынды 9-сынып оқушысы Айкөркем Нұрымова жеңіп алды. Оған "Huawei" смарт сағаты берілді. Үшінші орынды Владимир Коротков пен Виталий Гончаров өзара бөлісті, оларға "Xiaomi" смарт сағаты мен самокат табысталды. Ынталандыру сыйлықтары Мадина Ниязова, Виолетта Короткова, Ясмина Уразбаева, Амина Бурдзиева және Әнел Нұрымоваға берілді. Айта кету керек, байқауға қатысып жүлделі орыннан көріне алмаған қатысушылар да шет қалмады, олардың барлығына сыйлықтар табыс етілді.
Есенқос Әділбаев отбасылық үлгідегі балалар ауылының тәрбиеленушілеріне байқауға белсенді қатысқандары үшін алғысын білдірді және оларға жаңа оқу жылында оқуда озат, табысты болуына және жарқын сәттер көп болсын деген жүрекжарды тілегін жеткізді. Естеріңізге сала кетсек, аталмыш байқау Каспий теңізі күнін мерекелеу аясында өткізілген болатын.
Байқаудың басты мақсаты - балаларды Каспий теңізінің табиғатын құрметтеуге деген қызығушылығын арттыру болды. Байқауға 4 пен 18 жас аралығындағылар қатысты. Ережеге сәйкес байқауда түрлі материалдарды қолдануға рұқсат етілген: қағаз, картон, пластилин, жүн, сыны, мата, жіп және т.б.
27 августа 2021
Каспий итбалығының популяциясын сақтау.
Каспий теңізінің қазақстандық бөлігінде тасталған балық аулау торлары мен басқа да теңіз қоқыстарын жинау жөніндегі жобаны іске асыру жалғасуда. Бл туралы бүгін Маңғыстау облыстық қоғамдық коммуникация орталығының ақпараттық алаңында өткенде брифингте айтылды.
Жоба «Теңізшевройл» компаниясымен 2019 жылы ғылыми және қоғамдық ұйымдармен басталған: «Гидробиология және экология институты» мекемесімен, «ЭкоМангистау» үкіметтік емес мекемесімен, «EcoWestAqtau» ЖШС, «Жайық-Каспий облысаралық бассейндік балық шаруашылығы инспекциясы» ЖШС, Маңғыстау облысының табиғи ресурстарды және табиғатты пайдалануды реттеу басқармасы және өңірлік мемлекеттік органдармен бірлесіп іске асырылады.
2021 жылғы жұмыстардың мақсаты – Каспий итбалықтарының қоныс аудару жолдарында, акваторияда және Итбалық аралдарының жанындағы (негізінен Құлалы аралдары) теңіз жағалауында тасталған балық аулау торлары мен қоқыстардан, эндемиялық түрдің негізгі әлеуетті жатақтарының бірі ретінде және Каспий итбалығы популяциясының жай-күйіне олардың әсерін бағалау үшін тексеру және тазарту. Экологиялық жоба шеңберінде жұмыстар Подгорный, Рыбачий, Құлалы аралдарының жағалауында және аралдар арасындағы және Итбалықтар архипелагының аралдары бойындағы таяз су учаскелерінде 1-і мен 20-шы қыркүйек аралығында жүргізілетін болады. 2019 жылдың күзінде 3 апта ішінде 500-ге жуық тасталған аулар (2 850 кг) және 6 500 кг басқа қалдықтар (шыны, пластик, тұрмыстық қалдықтарды қоса алғанда) жиналғанын айта кету керек.
Осы жоба аясында осы кезеңде Түбқараған түбегінің батыс жағалауында табылған итбалықтардың мәйіттері мен қалдықтарын зерттеу нәтижелері балық аулау торлары олардың көпшілігінің өліміне әкелетінін көрсетеді. Жағалауда табылған тасталған балық аулау торларының көп бөлігі монофиламентті және ірі торлы желілерге жатады. Олар итбалықтар үшін ең қауіпті, өйткені жануарлар мұндай торларда оңай оралып және/немесе бірден өледі немесе торларды немесе олардың сынықтарын өздерімен алып жүреді, бұл кейіннен жануарлардың өліміне әкеледі.
Сондықтан, өлген итбалықтардың жасын талдау нәтижелері көрсеткендей, олар 20-30 жас аралығында шектеліп, 50 жасқа дейін өмір сүрмейді. 2020 жылғы күзгі экспедицияның нәтижесінде 3 790 кг тасталған балық аулау торлары жиналды. 2020 жылғы зерттеулер итбалықтардың аумағында ең ластанған, төрт аралдар арасында көбірек аулар (61,8%) шегеленеді және тасталатын Кұлалы аралы екенін көрсетті, онда зерттелген төрт арал – Подгорный, Морской, Рыбачий, Кұлалы. Сонымен қатар, Құлалы аралының батыс бөлігіндегі сыртқы доғаның периметрінің тек 29%-ы зерттелді, бұл осы аймаққа көбірек назар аудару қажеттілігін көрсетеді. Зерттеулер көрсеткендей, итбалықтардың барлық зерттелген учаскелері әртүрлі ұзындықтағы және пішінді пластикалық микробөлшектермен ластанған, сонымен қатар макропластикаға жататын ірі синтетикалық талшықтар табылған.
Бұдан басқа, сынамаларда пластикке жатпайтын басқа да артефактілер бар. Микропластик Каспий итбалығының қоректену объектілері болып табылатын долгин майшабағының, Каспий вобласының, сингилидің, домалақ бұқаның және цуцик бұқасының асқазан-ішек жолдарында табылды. Аталған жобаны іске асыру Каспийдің қазақстандық бөлігінде Каспий итбалығының жоғалған мекендеу орындарын қалпына келтіру жөніндегі пилоттық миссияға айналады. Алынған тәжірибе мен білімді кейіннен Каспий теңізінде жоғалған итбалықтардың мекендеу орындарын қалпына келтіру үшін де таратуға болады.
26 августа 2021
ҚР Парламент Мәжілісі депутаттарының қоғамдық экологиялық кеңес мүшелерімен кездесуі
«Nur Otan» партиясы Маңғыстау облыстық филиалы жанындағы қоғамдық экологиялық кеңес мүшелері ҚР Парламенті Мәжілісінің депутаттары Еділ Жаңбыршин және Самат Мусабаевпен кездесті.
Офлайн және онлайн режимдерінде өткен кездесу барысында «Nur Otan» партиясы республикалық қоғамдық экологиялық кеңес төрағасының орынбасары, мәжілісмен Еділ Жаңбыршин өзінің республика және облыс деңгейіндегі экологиялық мәселелерді шешу бағытындағы қызметімен таныстырды.
Қошқарата улы көлі, тұрмыстық қатты және құрылыс қалдықтары, көгалдандыру мен ауыз су тапшылығы мәселелері, биылғы құрғақшылықтың облыс мал шаруашылығына тиіп жатқан ауыр зардабы сияқты өзекті проблемаларды шешудің тиімді жолдарын іздестіруді кездесуге қатысушылар талқылады.
Халық қалаулысы Самат Мусабаев Каспий теңізінің экологиялық мәселелерін шешуге облыстық кеңес мүшелерін белсенді атсалысуға шақырды.
Әділбек Қозыбақов өз тарапымнан, облыстық кеңес төрағасы ретінде, «Табиғи орта» Батыс Қазақстан ҮЕҰ өңірлік ассоциациясы Биоалуантүрлілікті қорғау бойынша қоғамдық инспекциясының қызметін жаңа Экологиялық кодекстің талаптарына сәйкестендіру мақсатында «Nur Otan» партиясы республикалық қоғамдық экологиялық кеңесінің қолдауы керектігін айтты.
24 августа 2021
«Nur Otan» партиясы Маңғыстау облыстық филиалы жанындағы Сыбайлас жемқорлыққа қарсы іс-қимыл жөніндегі қоғамдық кеңестің кезекті отырысы өтті.
Отырыста 2020 жылдың және 2021 жылдың 6 айында білім саласындағы сыбайлас жемқорлық тәуекелдерін болдырмау бойынша атқарылып жатқан іс-шаралар туралы Маңғыстау облысы білім басқармасының басшысы Светлана Төлебаева баяндама жасады.
Оның айтуынша, облыстың білім беру ұйымдарының тәрбие беру бағдарламаларына сыбайлас жемқорлыққа қарсы тәрбие мәселелерін енгізе отырып, сыбайлас жемқорлық көріністеріне төзбеушілікті қалыптастыру бағытында жұмыстар жүргізілуде. Сыбайлас жемқорлыққа қатысты қылмыс жасалған мекеменің бірінші басшысының жауапкершілікте болады деген облыстағы барлық білім беру ұйымдарының жарғысына енгізілген.
Маңғыстау облысы бойынша барлығы – 163 жалпы орта білім беру ұйымы бар. Оның ішінде – 143 күндізгі, 5 – кешкі, 15 – жекеменшік мектеп. Облыстағы жалпы білім беру ұйымдарының басшылары тоқсан сайын ата-аналар мен ұжымның алдында есеп беру кездесулерін өткізіп отырады. Сонымен қатар 2020-2021 оқу жылының І жартысындағы қамқоршылық кеңесі мүшелеріне атқарған жұмысының есебі туралы жиналыстар өткізілді.
Облыстың білім беру ұйымдарында сыбайлас жемқорлық көріністеріне төзбеушілікті қалыптастыру мақсатында 141 мектепте «Адал ұрпақ» клубтары құрылып, оған 50000-нан аса оқушы, 25 колледжде «Саналы ұрпақ» клубтары құрылып, оған 3824 студент (2020 ж. – 1033) қамтылды.
Маңғыстау облысының білім басқармасы және Қазақстан Республикасының сыбайлас жемқорлыққа қарсы іс-қимыл агенттігінің Маңғыстау облысы бойынша департаментімен бірлескен жұмыстар атқарылуда. «Саналы ұрпақ – Жарқын болашақ» жобасы аясында «Sanaly urpaq» Республикалық жобалық кеңсесінің жұмыс жоспарының үлгісіне сәйкес, колледждермен өңірлік Департамент арасында екі жақты жоспар бекітілді.
2020 жылдан бастап білім саласында жергілікті атқарушы органдар көрсететін мемлекеттік қызметтер 93 % автоматтандырылды. Өтініштер электронды үкімет веб-порталы арқалы қабылданып, арнайы ақпараттық жүйеде өнделеді.Осылайша, жүйе қосылғаннан бері қызмет электронды түрде көрсетілді
Қағаз жүзінде көрсетілетін қызметтер біртіндеп, мемлекеттік корпорация арқылы көрсетілуде. Соның бірі, 2019 жылдан бастап талапкерлерді техникалық және кәсіптік білім беру ұйымдарына қабылдау автоматтандырылды.
Кеңес мүшелері күн тәртібінде көтерілген мәселе бойынша өздерін толғандырған сұрақтарға тұшымды жауаптарын алып, ұсыныстарын айтты. Айта кету керек, облыстық білім басқармасының басшысы Светлана Төлебаева білім беру ұйымдарындағы сыбайлас жемқорлық деректерінің жолын кесу және болдырмау бойынша барлық сұрақтарды өзінің жеке бақылауында ұстап отырғанын тілге тиек етті.
20 августа 2021
ҚР Парламенті Мәжілісінің депутаттары, "Nur Otan" партиясы фракциясының мүшелері Еділ Жаңбыршин мен Мұсабаев Самат Маңғыстаудағы жұмыс сапары барысында "Қошқар-ата" көліндегі рекультивация жұмыстарының жағдайымен танысты.
Айта кету керек, «Қошқар-ата" қалдық қоймасын қалпына келтіру жұмыстарының I кезеңі жобасы бойынша 2019 жылы Маңғыстау облысының әкімдігі конкурс жариялап, нәтижесінде «Павлодар өзен порты» АҚ жеңімпаз болды.
Республикалық бюджеттен 2021 жылға жобаны бастауға 1,0 млрд. теңге қаржы бөлінген. Алайда, жобаның мемлекеттік сараптама қорытындысын қайта қарауды және көлдегі жағдайды әлі де зерттеу, зерделеу мақсатында, бөлінген қаржыны Экология, геология және табиғи ресурстар министрлігі кейінгі айларға ығыстырып отыр.
2021 жылдың 12 наурыз күні мердігер өз қаражат есебінен рекультивациялау жұмыстарын бастап кеткен болатын. Бүгінгі күнге дейін 100 га аумақты 300 000 м3 топырақпен көмілген. Экология министрлігі қаражат беруді кейінге қалдырған соң, мердігер жұмысты тоқтатуға мәжбүр болды.
23.06.2021 жылғы Экология, геология және табиғи ресурстар министрлігінің нұсқауы бойынша ҚР «Ядролық физика институты» РМК және ҚР «Радиациялық қауіпсіздік және экология институты» РМК мекемелеріне «Қошқар-Ата» қалдықтар қоймасының қалпына келтіру жобалық құжаттамасы қосымша зерделенсін деген тапсырмасына сәйкес мамандар келген болатын.
Қазірге кезде, жоғарыда аталған мекемелерден "Қошқар-ата" қалдық қоймасын қалпына келтірудің I кезеңі жобасының жобалық-сметалық құжаттамасын зерделеу бойынша ұсыныстар туралы жауаптары күтілуде.
Сонымен қатар, бөлінген қаражатты ҚР Парламенті Мәжіліс депутаттары Е.Жаңбыршин мен С.Мұсабаев қыркүйекте Мәжілістің екінші сессияның жұмыс басталысымен, ең бірінші осы мәселе бойынша экология министрімен тікелей сөйлесіп, жан-жақты зерттеп, жұмыстың жүруіне ықпал жасайтындығын айтты.
Социальные сети
Меню подвал