Ақтау қаласында мемлекеттік органдарға арналған киберқауіпсіздік семинары өтуде
Ақтау қаласында мемлекеттік органдар қызметкерлеріне арналған киберқауіпсіздік бойынша оқыту семинары ұйымдастырылды. Іс-шараны Expertise France компаниясы Қазақстан Республикасы Жасанды интеллект және цифрлық даму министрлігімен бірлесіп өткізуде.
Семинар Mangystau IT Hub базасында Маңғыстау облысының Цифрлық технологиялар басқармасының қолдауымен ұйымдастырылып отыр. Шараның негізгі мақсаты – мемлекеттік сектор қызметкерлерінің киберқауіпсіздік саласындағы білімін арттыру, цифрлық қауіптерді анықтау және олардың алдын алу бойынша тәжірибелік дағдыларды дамыту.
Бағдарлама аясында қатысушылар ақпараттық жүйелерді қорғау, фишингтік шабуылдардың алдын алу, дербес деректердің қауіпсіздігін қамтамасыз ету, киберинциденттерге әрекет ету және заманауи цифрлық қауіптерге қарсы тұру мәселелерін талқылайды.
Семинар барысында халықаралық сарапшылар мен салалық мамандар өз тәжірибелерімен бөлісіп, мемлекеттік органдардың ақпараттық қауіпсіздік деңгейін арттыруға бағытталған үздік тәжірибелерді ұсынады.
Ұйымдастырушылардың пікірінше, мұндай білім беру іс-шаралары мемлекеттік мекемелердің цифрлық тұрақтылығын нығайтуға және азаматтардың деректерін қорғау деңгейін арттыруға ықпал етеді.