Жаркент мешітінде реставрация жұмыстары жүргізіліп жатыр

Жетісу облысындағы Жаркент мешітінде ғылыми-реставрациялық жұмыстар кезең-кезеңімен жүргізіліп жатыр.

Бүгінде «Қазқайтажаңарту» РМК мамандары шатыр жабындысын қалпына келтіру жұмыстарын аяқтады. Қазір мешіт мұнарасы, айваны, кіреберіс порталы мен қаптал қақпаларының беті көп жылдан бері жиналған кір-қоқыс пен түрлі ластанудан тазартылып жатыр.

Алдағы кезеңде сыртқы 52 ағаш тіреу бағаны, қасбеттер, кірпіш сылақтары және бүгінге дейін сақталған сәндік өрнектер қалпына келтіріледі. Сондай-ақ күмбез бен сыртқы кірпіш беттері арнайы өңдеуден өткізіліп, қоршаулар жаңғыртылады.

Әрбір жұмыс ескерткіштің сәулеті мен ағаш ою-өрнектерін, көркемдік нақышын барынша сақтай отырып жүргізіліп жатыр. Ескерткішке іргелес аумақ та абаттандырылып жатыр.

Сонымен бірге Мемлекет басшысы Қасым-Жомарт Тоқаевтың Жаркент мешітін ЮНЕСКО-ның Бүкіләлемдік мұралар тізіміне енгізу жөніндегі тапсырмасы аясындағы жұмыстар кезең-кезеңімен іске асырылып келеді.

 

ҚР Мәдениет және ақпарат министрлігінің баспасөз қызметі