Алматыда ашық аспан астындағы «Опера түні» жобасын 5 мыңнан астам көрермен тамашалады

Алматыда Абай атындағы Қазақ ұлттық опера және балет театрының 92-театр маусымының жабылуына арналған «Опера түні» мәдени жобасы өтті.

Open Air форматындағы концерт театр алдындағы алаңда ұйымдастырылды. Іс-шараға 5 мыңнан астам адам жиналды. Кеш барысында әлемдік және ұлттық опера өнерінің үздік туындылары орындалды.

«Опера түні» жобасы – Алматының мәдени өміріндегі жаңа бастамалардың бірі. Бұған дейін Мемлекет басшысы Қасым-Жомарт Тоқаев Алматының тұрғындар мен қала қонақтарына тәулік бойы қызмет көрсететін мегаполис ретінде дамуы қажет екенін атап өткен болатын. Осы орайда, аталмыш жоба ашық кеңістікте өтетін мәдени іс-шараларға қала тұрғындарының қызығушылығы жоғары екенін көрсетті.

Кеш бағдарламасында «Біржан – Сара», «Абай», «Аида», «Турандот», «Травиата», «Богема», «Севильдік шаштараз», «Норма», «Самсон мен Далила» операларынан үзінділер көрерменге ұсынылды. Сондай-ақ Карл Орфтың O Fortuna шығармасы мен «Гүл Алматым» әні шырқалып, оны көрермендер әртістермен бірге орындады.

Жобаға театрдың жетекші солистері, хоры және симфониялық оркестрін қоса алғанда, 200-ден астам өнерпаз қатысты. Концертті дирижерлер Нұржан Байбосынов пен Қуаныш Исмаилов жүргізді. Хор ұжымына бас хормейстер Әлия Темірбекова жетекшілік етсе, режиссерлік жұмысты Наталья Кагадий мен Алуа Сабо атқарды.

 

ҚР Мәдениет және ақпарат министрлігінің баспасөз қызметі