Наурызнама аясында Шымкент қаласының жоғары оқу орындары студенттері арасында зияткерлік ойын өтті

Наурызнама мерекесінің онкүндігі аясында Шымкент қаласында «Қазіргі қоғамдағы дәстүр мен мәдениеттің рөлі» тақырыбында зияткерлік ойын өтті. Іс-шара қалалық Жастар саясаты басқармасының бастамасымен ұйымдастырылды. Ойынға қаладағы сегіз жоғары оқу орнының студенттері қатысты.

Зияткерлік ойын мақсаты – жастардың ұлттық дәстүр мен мәдени мұраға қызығушылығын арттыру, рухани құндылықтарды насихаттау, сондай-ақ студенттердің шығармашылық және зияткерлік әлеуетін дамыту.

Байқау бірнеше кезеңнен тұрды. Бірінші кезең – командалардың таныстырылымы, екінші кезең – мәдениет пен дәстүрге арналған өлеңдер оқу. Үшінші кезеңде мереке тақырыбына байланысты «Дода» форматында сұрақ-жауап сайысы өтті. Соңында қатысушылар өздерінің шығармашылық қабілеттері мен дарынын көрсетті.

Байқауға қатысқан барлық команда алғыс хаттармен марапатталды.

 

ҚР Мәдениет және ақпарат министрлігінің баспасөз қызметі