Абай атындағы театрда премьера: «Ұлы Жібек Жолы» балеті ұсынылды

Абай атындағы Қазақ ұлттық опера және балет театрында «Ұлы Жібек Жолы» атты екі бөлімді балеттің премьерасы өтті. Музыка авторы – композитор Әйгерім Еркебаева. Қойылымның идеясын, концепциясын, либреттосы мен хореографиясын театр балет труппасының көркемдік жетекшісі, Қазақстанның халық әртісі Гүлжан Тұтқыбаева жазды.

Қойылым Ұлы Жібек жолының мәнін жаңаша зерделейді. Тарихи тақырып пен бүгінгі заман ұштасып, көрерменге уақыт пен кеңістік арасындағы терең байланысты көрсетеді. Сюжет цифрлық оқшауланған әлемнен басталады. Алайда басты кейіпкер шынайы сезімдерін жоғалтпаған адам. Оның абыз қартпен жүздесуі көрерменді ежелгі дәуірге, Ұлы Жібек жолының гүлденген кезеңіне алып келеді.

Осылайша, тарихи Шығыстың көзтартар көріністерін, керуен-сарай, түрлі елдер мен мәдениеттердің арасындағы сауда-саттық, базарды көреді. Сол ортада жас жігіт тазалық мен адалдықтың символындай болған Ақсұңқар есімді бойжеткенді кездестіреді. Ол оның ішкі әлемін оятып, терең сезімге жетелейді. Алайда олардың арасына айна сататын венециялық саудагер түседі. Ол жылтыраған дүниемен Ақсұңқарды арбап, басқа әлемге алып кетеді.

Жас жігіт оны қайтару үшін түрлі қиындықтарға тап болады. Елестермен бетпе-бет келіп, өзін жеңеді. Сөйтіп ол өз заманына оралып, суық қалаға жан бітіреді.

«Ұлы Жібек Жолы» балеті – философиялық толғам, тарихи көркемдік және заманауи сахналық шешімдер үйлескен туынды. Ол қай заман өтсе де, мағынасын жоғалтпайтын мәңгілік құндылықтар туралы терең ойға жетелейді.

ҚР Мәдениет және ақпарат министрлігінің баспасөз қызметі