Шығыс Қазақстан облысында ШЫҰ жас дарындары мен көшбасшыларының кездесуі өтіп жатыр

Шығыс Қазақстан облысында Шанхай ынтымақтастық ұйымына мүше елдердің жас дарындары мен көшбасшыларының кездесуі өтіп жатыр. Бұл бастама Қазақстан Республикасының Мәдениет және ақпарат министрлігі тарапынан жүзеге асырылуда. Іс-шара 2024 жылғы 4 шілдеде Астанада өткен ШЫҰ-ға мүше мемлекеттер басшылары кеңесінің отырысында жасалған келісім негізінде ұйымдастырылды. Аталған жиында Мемлекет басшысы Қасым-Жомарт Тоқаев қазіргі заман жағдайында бірлік пен күшті біріктірудің маңызын атап өткен болатын.

Іс-шара ШҚО әкімдігі, «Amanat» партиясының жастар қанаты – «Жастар рухы» және «Esbol Qory» қоғамдық қорының қолдауымен өтуде. Кездесуге ШЫҰ-ға мүше мемлекеттер – Қытай Халық Республикасы, Ресей Федерациясы, Қырғызстан, Өзбекстан және Тәжікстаннан келген делегаттар қатысуда.

Кездесудің басты мақсаты – тәжірибе алмасуға арналған тұрақты платформа құру, жастар арасындағы ынтымақтастықты нығайту және халықаралық әріптестікті дамыту.

Бағдарлама аясында заманауи жастар саясатының өзекті мәселелері талқыланатын маңызды іс-шара – «SCO Youth Dialogue» жастар форумы өтеді. Қатысушылар үздік тәжірибелерімен бөлісіп, ШЫҰ кеңістігіндегі жас ұрпақ алдында тұрған қатерлер мен мүмкіндіктерді талқылайды.

Сапар аясында өңірдің белсенді жастарымен кездесулер, панельдік сессиялар, мәдени іс-шаралар мен Шығыс Қазақстан облысының туристік нысандарына бару жоспарланған.

Форумның Қазақстанда өтуі ШЫҰ аясындағы жастар ынтымақтастығын нығайтуға, еліміздің халықаралық имиджін қалыптастыруға және жас көшбасшыларды қолдауға, сондай-ақ өңір болашағын қалыптастыруға бағытталған бастамаларды дамытуға сеп болады.

 

ҚР Мәдениет және ақпарат Министрлігінің баспасөз қызметі