«Отбасындағы зорлық-зомбылықсыз Қазақстан» республикалық акциясы аясында отбасылық зорлық-зомбылық құрбандарымен жұмыс істейтін полицейлерге арналған арт-терапия өтті

Астанада ҚР ІІМ Астана қаласы Полиция департаментінің Отбасылық-тұрмыстық зорлық-зомбылыққа қарсы іс-қимыл бөлімі қызметкерлеріне арналған арт-терапия семинары өтті. Іс-шара «Отбасындағы зорлық-зомбылықсыз Қазақстан» республикалық акциясы аясында ұйымдастырылды.

Жиын ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның, ҚР Мәдениет және ақпарат министрлігінің, сондай-ақ Қазақстандағы «БҰҰ-әйелдер» құрылымы Кеңсесінің қолдауымен өтті.

Семинар барысында тәртіп сақшылары кәсіби күйзелістің алдын алу жолдарын, психологиялық тұрғыдан өз-өзіне қолдау көрсету әдістерін үйренді. Сонымен қатар, қатысушылар үшін арнайы арт-терапия сеансы ұйымдастырылды.

«Отбасындағы зорлық-зомбылықсыз Қазақстан» науқаны биыл 20 мамыр мен 20 маусым аралығында еліміздің барлық өңірінде өтіп жатыр.

Басты мақсат — қоғам назарын тұрмыстық зорлық-зомбылықтың өзекті мәселесіне аудару, отбасы құндылықтарын, өзара сыйластық пен қолдауды насихаттау, сондай-ақ құқық қорғау органдарының осы саладағы жұмысы жөнінде көпшілікті хабардар ету.

 

ҚР Мәдениет және ақпарат министрлігінің баспасөз қызметі