Қазақстандық әзірлеушілерге команда құрып, өз ойын әлемдік нарыққа шығаруға көмектеседі
Astana Hub алғаш рет GamePreneurs 2026 бағдарламасын іске қосады. Бұл GameDev саласындағы мамандарға арналған акселерациялық бағдарлама. Бағдарлама өз ойын жобасын жасауды қалайтын, бірақ идеядан бастап нарыққа шығуға дейін бірге жұмыс істейтін командасы әлі қалыптаспаған мамандарға бағытталған.
Бағдарлама әзірлеушілерге, геймдизайнерлерге, 2D/3D-суретшілерге, sound designer-лерге, QA-мамандарына, продюсерлерге, product және project менеджерлерге, сондай-ақ ойын индустриясының басқа да мамандарына арналған. Қатысу үшін дайын команданың болуы міндетті емес, команданы қалыптастыру бағдарламаның бір бөлігі болады.
«GameDev және IT саласындағы көптеген талантты мамандар өз жобаларын іске қоспайды, себебі команда таба алмайды немесе ойын идеясын нақты өнімге қалай айналдыру керектігін білмейді. GamePreneurs 2026 дәл осы кедергіні азайту үшін құрылған: бағдарлама қатысушыларға идеядан MVP-ге дейінгі жолды жүріп өтуге, өнімді нақты пайдаланушыларда тестілеуге және оны баспагерлерге ұсынуға дайындалуға көмектеседі», — дейді Astana Hub технологиялық орталықтар офисінің директоры Анарбек Утегулов.
Бағдарламаның басты ерекшеліктерінің бірі — Pre-Accelerator кезеңі. Ол 3–4 аптаға созылады. Осы уақыт ішінде қатысушылар бір-бірімен танысып, 2–5 адамнан тұратын командаларға бірігеді, ойын идеясын пысықтайды және ойын әзірлеу мен ойын кәсіпкерлігінің негізгі құралдарын меңгереді. Бұдан кейін командалар Accelerator кезеңіне өтеді. Бұл 9–12 аптаға созылатын негізгі кезеңде қатысушылар нарық пен аудиторияны зерттеу, MVP әзірлеу, гипотезаларды тексеру, өнімдік метрикаларды жинау, soft launch-қа дайындалу және финалдық питчке әзірлену кезеңдерінен өтеді.
GamePreneurs 2026 білім беру, кәсіпкерлік және өнім әзірлеу бағыттарын біріктіреді. Қатысушылар апталық менторлық сессияларға, геймдизайн, техникалық өндіріс, арт-пайплайн, дыбыстық дизайн, QA, маркетинг, монетизация, аналитика және питч дайындау бойынша шеберлік сабақтарына, сондай-ақ ойын әзірлеу индустриясында тәжірибесі бар профильдік мамандардың жеке консультацияларына қол жеткізеді.
Сонымен қатар командалар UA-тестілеу бойынша қолдауды, аналитикалық құралдарды және Astana Hub-тың Астанадағы инфрақұрылымын пайдалана алады. Финалистер өз жобаларын Demo Day аясында инвесторлар мен ойын баспагерлерінің өкілдеріне ұсынады.
Бағдарламаның басты мақсаты — тек ойын әзірлеуді үйрету емес, халықаралық нарыққа шығуға дайын өнім жасауға көмектесу.
GamePreneurs 2026 бағдарламасына қатысу тегін. Өтінімді Қазақстан азаматтары да, шетел азаматтары да бере алады. Қатысушылардың жасы 18-ден жоғары болуы және IT және/немесе GameDev саласында тәжірибесі немесе құзыреті болуы қажет.
Өтінімдер 2026 жылғы 31 тамызды қоса алғанда қабылданады.
Өтінімді Astana Hub платформасы арқылы беріп, GamePreneurs 2026 бағдарламасымен бірге өз ойын жобаңызды іске қосу жолын бастаңыз.