Қазақ сөздеріндегі дыбыс тіркесімін жасанды интеллект арқылы түзететін Qazemle IT бағдарламасының таныстырылымы

Қазақстан Республикасының Ұлттық академиялық кітапханасының конференц-залында мемлекеттік деңгейде маңызды инновациялық жоба – «Qazemle» IT бағдарламасының таныстырылымы өтті.

Іс-шараға ҚР Ғылым және жоғары білім министрлігі Тіл саясаты комитетінің төрағасы Ербол Ердембекұлы Тілешов қатысып, жобаға қатысты өз пікірін білдірді. Сонымен қатар таныстырылым жұмысына тіл жанашырлары, ғалымдар, ІТ мамандарды және журналистер қатысты.

Qazemle – қазақ тіліндегі сөздердің дыбыстық құрамындағы үндестік заңдылығы мен емле нормаларына қайшы келетін тіркесімдерді автоматты түрде тануға және түзетуге бағытталған ІТ шешім. Бұл бағдарлама – қазақ тілінің орфографиялық және орфоэпиялық нормаларын цифрлы кеңістікте сақтау мен нығайтуға бағытталған алғашқы отандық өнім. Жоба Қазақстан Республикасы Ғылым және жоғары білім министрлігінің Ғылым комитеті тарапынан гранттық негізде қаржыландырылып отыр.

Іс-шара барысында IT платформаның жұмыс істеу принциптері мен интерфейсі көрсетіліп, жобаның негіздемесі мен ғылыми тұғыры талданды.