Базарбай Исаевтың өнегелі жолы ұлықталуда
Биыл қазақ әдебиеті мен журналистикасына елеулі үлес қосқан ақын, жазушы, аудармашы, публицист, Қазақстан Журналистер одағы сыйлығының лауреаты, мәдениет қайраткері, запастағы полковник, жерлесіміз Базарбай Исаевтың туғанына 85 жыл толып отыр.
Осыған орай аудан әкімі Жарқынбек Ғалымжан Базарбай Исаевтың жары Күлан Байшаханқызы Искакованы арнайы қабылдап, қазақы дәстүрге сай ақ жаулық жауып, құрмет көрсетті.
– Базарбай Исаев – ел руханиятына өлшеусіз еңбек сіңірген, қаламгерлік пен азаматтықты қатар ұштастырған бірегей тұлға. Оның өнегелі өмір жолы мен мол шығармашылық мұрасы кейінгі ұрпаққа әрдайым үлгі болмақ, – деді аудан басшысы.
Өз кезегінде Күлан Байшаханқызы көрсетілген ілтипат пен құрмет үшін аудан басшылығына алғысын білдіріп, ізгі тілегін жеткізді.
Айта кету керек, Базарбай Исаевтың 85 жылдық мерейтойына орай ауданда бірқатар тағылымды іс-шаралар жоспарланған. Соның бірі – бүгін «Руханият» орталығында өтетін «Сөз бен сарбаз рухын тоғыстырған тұлға» атты облыстық арнау айтушылар байқауы мен «Боздаланың бұлбұлы» атты аудандық ақындар мүшайрасы. Бұл тағылымды шаралар қаламгердің шығармашылық мұрасын дәріптеп, жас ұрпаққа насихаттауға бағытталған.