Аудан әкімі қоғамдық кеңес алдында есеп берді

Бүгін аудан әкімі Талғат Дүйсебаев қоғамдық кеңес алдында 2020 жылдағы ауданның әлеуметтік-экономикалық даму қорытындылары мен алдағы уақытта жүзеге асырылатын жұмыстар жөнінде есеп берді. Аудан басшысы өткен жылы ауданға инвестиция тарту, агроөнеркәсіптік кешен, кәсіпкерлік, білім, мәдениет, денсаулық, спорт, инфрақұрылымдық жұмыстар, қоғамдық қауіпсіздік салаларындағы жетістіктерді атап өтті. Есепті баяндамада халықты жұмыспен, баспанамен, сапалы ауыз сумен, көгілдір отынмен қамтудағы нәтижелі жұмыстарды жеткізді.
Сонымен қатар, санитарлық талаптарға сай өткізілген қоғамдық кеңес отырысында аудандық мәслихат хатшысы Е.Әжікенов аудандық мәслихатта жыл көлемінде атқарылған жұмыстарға жан-жақты тоқталып өтті. Аудандық мәслихат хатшысы халық қалаулыларының соңғы бесжылдықтағы ел үшін жасаған жұмыстарын саралап, алдағы міндеттерді атап көрсетті.
Жиында аудандық қоғамдық кеңес төрағасы М.Омаров есепті кезеңде атқарылған жұмыстардың есебін беріп, қоғамдық кеңесте қозғалған және шешімін тапқан мәселелер жөнінде баяндады.
Қоғамдық кеңес мүшелері аудан әкімі, аудандық мәслихат хатшысы және аудандық қоғамдық кеңес төрағасының есептері негізінде өткен жылы атқарылған жұмыстарға оң бағаларын берді.