Аудан әкімі күрежол бойындағы нысандарды аралады

«Батыс Қытай – Батыс Еуропа» халықаралық транзиттік автодәлізінің 129 шақырымы Қазалы ауданының аумағынан өтеді. Еліміздің транзиттік әлеуетін арттыратын маңызды күре жолдың бойындағы аудан аумағында «Бақыт», «Мирас», «Арзан 1», «Арзан 2» жол бойы қызмет көрсету кешендері және «Sinooil», «TS Қызылорда мұнай өнімдері» жанар-жағар май бекеттері жұмыс жасайды.

Аудан әкімі Алмасбек Есмаханов аймақ басшысы Нұрлыбек Машбекұлының тапсырмасына сәйкес, тиісті сала басшыларымен бірге осы автодәліздің аудан аумағындағы бөлігін аралап, жол бойында орналасқан нысандардың жай-күйімен, санитарлық тазалығымен танысты. Аудан басшысы жолаушыларға қызмет көрсететін кешендер мен сервистік аймақтардың талапқа сай болуын, жол бойындағы инфрақұрылымдардың тиісті деңгейде жұмыс істеуін тапсырды.

Сондай-ақ, аудан аумағынан өтетін бұл халықаралық дәліздің мүмкіндігін тиімді пайдалану – жергілікті кәсіпкерлік пен сауданы дамытуға да жол ашатынын айтып, транзиттік жол бойындағы туризмді дамыту мүмкіндіктеріне де ерекше тоқталып өтті.

Аудан әкімі жол бойындағы қызмет көрсету кешендері мен жанар-жағар май құю бекеттерінің санитарлық тазалығы және өрт қауіпсіздігі ережелері сақталмаған нысандарға тиісті сала басшыларына ескертулер беріп, айыппұлдар салу жөнінде тапсырма берді. Күре жолдың бойындағы тазалық – ауданның келбеті екенін айтқан аудан басшысы әрбір нысан иесіне жауапкершілікпен қарап, тазалық пен тәртіпті қамтамасыз ету бойынша бірқатар тапсырмалар берді.