Аудан әкімі Аманжол Оңғарбаевтың аудан жұртшылығын Рамазан айының басталуымен құттықтауы

Құрметті ағайын!

Сіздерді барша мұсылман қауымы үшін қасиетті де, қадірлі Рамазан айының басталуымен шын жүректен құттықтаймын!

Он екі айдың сұлтаны саналатын Рамазан айы – сабыр мен сыйластықтың, мейірім мен кешірімнің, игілік пен ізгіліктің айы. Бұл айда мұсылман жамағаты рухани тазару жолына түсіп, қайырымдылық пен жақсылық жасауды басты орынға қояды.

Ораза – тек ішіп-жеуден тыйылу ғана емес, ол жан мен тәннің тазаруы, сабыр мен шүкіршілікке тәрбиелейтін үлкен сынақ әрі сауапқа толы мүмкіндік.

Ата-бабамыз Рамазан айында ынтымақ пен бірлікті ту етіп, көмекке мұқтаж жандарға қол ұшын созып, жақсылық жасауды парыз санаған. Бұл игі дәстүр ұрпақтан-ұрпаққа жалғасып, халқымыздың рухани өмірінің ажырамас бөлігіне айналды.

Қадірлі ағайын!

Осы айда жасаған әрбір ізгі амалдарыңыз қабыл болып, шаңырақтарыңызға құт-береке, мол ризық, мызғымас ынтымақ орнасын! Еліміз аман, жұртымыз тыныш болып, келесі Рамазан айына есен-сау жетуді жазсын!

Ниеттеріңіз қабыл болсын!