Арал ауданы әкімінің Серік Сермағамбетов Арал қаласы тұрғындарымен өткен кездесуде инфрақұрылымды дамыту бойынша атқарылған жұмыстарға тоқталды.
«Аудан бойынша қазіргі таңда жер учаскесін алуға 7 мыңнан астам адам кезекте тұр. Бүгінде осы кезектілікті азайту мақсатында «Нұрлы жер» мемлекеттік бағдарламасы аясында Арал қаласындағы №5 шағын ауданында электр желісінің құрылысы мен №6 шағын ауданында электр желісінің және су желісінің құрылыс-монтаж жұмыстары жүргізілуде. Бұл бағытта республикалық бюджеттен 567 млн. теңге қаралса, биылғы жылға құрылыс жұмыстарын аяқтауға облыстық бюджеттен 62 млн. теңге қаржы қаралды.
Сондай-ақ №8 мөлтек ауданды жүзеге асыруға Республикалық бюджеттен қаржы тартылды. Бұл өз кезегінде тұрғын үй құрылысына жер учаскелерін алуға 2008-2011 жылдар аралығында кезекте тұрған 1043 тұрғынның өтініштерін қанағаттандыруға мүмкіндік беруде»-, деді С. Сермағамбетов.