Ұлттық ұлан сарбаздары елордаға жаңа жылдық көңіл күй сыйлады

Жаңа жыл қарсаңында ҚР ІІМ Ұлттық ұланының әскери қызметшілері «Хан Шатыр» сауда-ойын-сауық орталығында елорда тұрғындары мен қонақтарына ерекше музыкалық сый жасады.

Сауда орталығы қонақтары үшін күтпеген сәтте әскери киімдегі ұландықтар көпшілікке сүйікті жаңа жылдық әуендерді орындады. Мерекелік перформансқа ІІМ Ұлттық ұланының ерлер хоры мен Үлгілі-көрсетімді оркестрі қатысып, Jingle Bells және қазақ тіліндегі Happy New Year секілді танымал композицияларды шырқады. Көрермендер өнерпаздарды жылы ықыласпен қарсы алды.

Музыкалық қойылым небәрі бірнеше минутқа ғана созылғанымен, бұл уақыт адамдарға шынайы эмоция мен мерекелік көңіл күй сыйлауға жеткілікті болды. Сауда орталығының келушілері бір сәтке аялдап, болған сәтті телефонға түсіріп, әскери қызметшілерге ду қол шапалақпен алғыстарын білдірді.

Қаланың қарбалас тіршілігінде бұл тосын концерт күнделікті күйбеңнен бір сәтке алыстатып, Жаңа жылдың жақындағанын сезінуге мүмкіндік берді.

Әскери қызметшілердің айтуынша, олардың басты мақсаты - адамдарды қуантып, шынайы әрі жылы эмоциялардан туындайтын мерекелік көңіл күйді бірнеше минутқа болса да сыйлау.

 

ҚР ІІМ Ұлттық ұланының баспасөз қызметі