Өзбекстанның ІІМ делегациясы Ұлттық ұланның Бас қолбасшылығында болды

ҚР ІІМ Ұлттық ұланының Бас қолбасшылығына Өзбекстан Республикасы Ішкі істер министрлігінің ресми делегациясы келді. Сапар мақсаты – тәжірибе алмасу және күзет пен айдауыл қызметін ұйымдастырудың озық тәсілдерін зерделеу.

Делегация құрамында Қараулдық әскерлер қолбасшылығы штабы бастығының орынбасары полковник Акбар Очилов, Күзету техникасын енгізу бөлімінің аға офицері подполковник Элбек Шайманов және Штабтың жауапты қызметкері подполковник Бахтиёр Рахимов болды.

Ұлттық ұлан Бас қолбасшысының бірінші орынбасары – Бас штаб бастығы генерал-лейтенант Қайрат Актановтың қатысуымен өткен жұмыс кездесуінде қызметтің негізгі бағыттары мен әскердің тиімділігін арттыру тетіктері талқыланды.

Делегация әскери бөлімдердің жұмысы үйлестірілетін және заманауи мониторинг технологиялары қолданылатын Әскерлерді басқару орталығының қызметімен танысты.

Айдауыл қызметіне де ерекше назар аударылды. Өзбекстандық мамандар 6636 әскери бөліміне барып, сотталғандарды және күзетпен ұсталатын адамдарды айдауылмен алып жүру үшін  қолданылатын арнайы вагонның жұмыс тәртібімен танысты.

Сондай-ақ делегация Аршалыдағы  жеке атқыштар ротасына барып, қауіпсіздігі барынша жоғары түзету мекемесін  қорғау жүйесін және өндірістік процестерді зерделеді.

Сапар екі елдің құқықтық тәртіп пен қауіпсіздік саласындағы ынтымақтастығын нығайтып, озық тәжірибе алмасуға бағытталған жүйелі жұмыстың жалғасы болды.

 

ҚР ІІМ Ұлттық ұланының баспасөз қызметі