ҚР Ішкі істер министрінің орынбасары – Ұлттық ұланның Бас қолбасшысы Аңсаған Балтабеков жұмыс сапары аясында «Орталық» өңірлік қолбасшылығына қарасты 5516 (Теміртау қ.), 6505 және 5451 (Қарағанды қ.) әскери бөлімдерінде болды.
Сапар барысында Бас қолбасшы әскери қызметшілердің қызмет өткеру жағдайларына, тәртіптің сақталуына, күнделікті қызмет пен жауынгерлік даярлықтың ұйымдастырылуына мән берді. Сондай-ақ материалдық-техникалық жарақтандырылуына және тұрмыстық инфрақұрылымның деңгейіне ерекше назар аударды. Ол әскери қызмет сапасы тікелей жеке құрамның моральдық-психологиялық ахуалы мен олардың әлеуметтік-тұрмыстық жағдайларына байланысты екенін айтты.
Әрбір әскери бөлімде ұландықтардың толыққанды тамақтануын ұйымдастыру мен медициналық қамту мәселелері қаралды.
Сонымен қатар «Орталық» өңірлік қолбасшылығының штабында жауынгерлік әзірліктің жай-күйі, жергілікті атқарушы органдармен өзара іс-қимыл және қызмет тиімділігін арттыру бағытындағы түйткілдер талқыланды.
Жұмыс сапары соңында генерал-майор Аңсаған Балтабеков әскери қызметшілерге адал еңбектері үшін алғыс айтып, табыс тіледі. Ол Ұлттық ұланның елдегі қоғамдық тәртіп пен қауіпсіздікті қамтамасыз ету, заңдылықты нығайту бағытындағы жүйелі жұмысын жалғастыратынын атап өтті.
ҚР ІІМ Ұлттық ұланының баспасөз қызметі
1 шілдеде ҚР ІІМ Ұлттық ұланының барлық әскери бөлімдерінде жауынгерлік даярлықтың жаңа оқу кезеңінің басталуына орайластырылған іс-шаралар өтті.
Іс-шара Мемлекеттік Туды көтеруден және Қазақстан Республикасының Мемлекеттік Әнұранын орындаудан басталды.
Командирлер мемлекеттік-құқықтық дайындық сабақтарын өткізу кезінде бөліністердің жеке құрамдарына жауынгерлік даярлық сапасын арттыру, тәртіп пен жауапкершілікті нығайту секілді негізгі басымдықтарды жеткізді. Бұл пән әскери ұжымдардың дайындық деңгейін, әскери қызметшілердің құқықтық сауаттылығын арттыруға, жарғылар мен заңнама талаптарын терең зерделеуге бағытталған.
Әскери қызметшілермен сондай-ақ қару-жарақ пен әскери техниканы меңгеру, күнделікті міндеттерді орындау кезіндегі қауіпсіздік шараларын сақтау, жауынгерлік есептоптардың іс-қимылдарын зерделеу бойынша кешенді сабақтар өткізілді.
Жаңа оқу жылы — бұл жаңа міндеттер мен мақсаттардың бастауы. Әрбір әскери қызметші өзіне жүктелген жауапкершілікті сезініп, Отан алдындағы борышын адал орындауы тиіс.
Жауынгерлік дайындық, тәртіп және бірлік — ұландықтардың басты ұстанымы. Кәсіби деңгейді арттыру және жауынгерлік дайындықты жетілдіру қолбасшылықтың жіті назарында.
ҚР ІІМ Ұлттық ұланының баспасөз қызметі
Ұлттық ұланның 5573 жедел құрамасының сарбаздары бір күнде қос қырағылық танытты.
Қала тыныштығын қадағалау қызметін атқару барысында, кезінде әскери жасақ бастығы Ислам Қаппас пен патрульші Отабек Пардаев адасып жүрген 10 жасар қыз баланы байқап қалады. Бұл туралы байланыс құралдары арқылы патрульдік топ бастығы кіші сержант Мейірбек Эргашовқа бірден баяндайды. Жедел ұйымдастырылған іздестіру шараларының нәтижесінде қыз баланың анасы табылып, баласымен қауышты. Қуанған ана ұландық жауынгерлерге шынайы ризашылығын білдірді.
Сол күні шамасында әскери тізбекте тұрған қатардағы Ақниет Қозыбай қызмет өткеру кезінде “iPhone 14” ұялы телефонын тауып алады. Жауынгер дереу тиісті шаралар қабылдап, смартфон иесін анықтайлы. Көп ұзамай телефонына қол жеткізген азаматша сарбаздардың адалдығы мен жедел әрекетіне алғыс білдірді.
Аталған оқиғалар ұландықтардың тек жауынгерлік тапсырмаларды орындаумен ғана шектелмей, қоғам алдындағы азаматтық парызын абыроймен атқарып жүргенін айғақтайды. Әскери қызметшілердің мұндай іс-әрекеттері – ел сенімінің тірегі, қоғамдағы тұрақтылық пен қауіпсіздіктің кепілі.
ҚР Ұлттық ұланының баспасөз қызметі
Павлодар қаласында «Kazakhstan Kahles Dynamic Long Range Competition» атты спорттық снайпингтен халықаралық жарыс өтті.
Бұл турнирге Қазақстан мен Қырғызстаннан келген 59 үздік мерген қатысты. Олардың қатарында әскери қызметшілер, күштік құрылым өкілдері және ҚР IPSC Практикалық атыс федерациясының мүшелері болды.
Жарыс шынайы әскери жағдайға барынша жақын ортада өтті. Қатысушылар ұзақ қашықтыққа түрлі тұрыста атып, күрделі тактикалық жаттығуларды еңсерді.
Нәтижесінде ҚР ІІМ Ұлттық ұланының әскери қызметшілері «тактикалық класс» санатында жоғары шеберлік танытып, II және III орындарды иеленді.
Бұл нәтиже «Burkit team» командасының кәсіби даярлығының жоғары деңгейде екенін және жауынгерлік жағдайда тиімді әрекет ете алатынын дәлелдеді.
Айта кету керек, мұндай халықаралық жарыстарға қатысу түрлі елдердің әскери қызметшілері арасындағы жауынгерлік бауырластықты нығайтып, тәжірибе алмасуға, кәсіби шеберлікті арттыруға және снайперлік дайындықты одан әрі дамытуға септігін тигізеді.
ҚР ІІМ Ұлттық ұланының баспасөз қызметі
Ақтөбе облысында өткен XI халықаралық «Айбын» жастар жиынында Қазақстан Республикасы ІІМ Ұлттық ұланының намысын қорғаған «Жас Бүркіт» әскери-патриоттық клубының командасы үшінші орынды иеленді.
Бұл жиынға Қазақстан, Әзербайжан, Беларусь, Қырғыз Республикасы, Ресей және Өзбекстаннан келген 800-ге жуық қатысушы жиналды. Шара Ұлы Жеңістің 80 жылдығы мен Кеңес Одағының Батыры Әлия Молдағұлованың 100 жылдығына арналды.
Жиынның салтанатты ашылуына Қазақстан Республикасының Президенті – Қарулы Күштердің Жоғарғы Бас Қолбасшысы Қасым-Жомарт Тоқаев қатысты. Ол жастар бойында патриоттық рухты қалыптастыру үшін мұндай шаралардың маңызды екенін атап өтті.
Жарысқа барлығы 51 команда қатысып, олар төрт топқа бөлінді. 19 командадан тұратын әскерлердің патриоттық клубтары тобында «Жас Бүркіт» командасы үздік үштіктен көрінді. Олар жоғары физикалық дайындық, тәртіп пен ұйымшылдық, нақты үйлесімділік және тактикалық сауаттылықтың арқасында ерекшеленді.
Бұл жетістік — «Жас Бүркіт» клубының сапалы даярлығы мен құқықтық тәртіп әскерлеріндегі әскери-патриоттық тәрбиенің нәтижесі. Ол — табандылықтың, тәртіптің және үздіксіз даму талпынысының жемісі. Осылайша жас сарбаздар халықаралық деңгейде Ұлттық ұланның мәртебесін асқақтатты.
ҚР ІІМ Ұлттық ұланының баспасөз қызметі
Петропавл қаласында ҚР ІІМ Ұлттық ұланының қоян-қолтық ұрыстан чемпионаты мәресіне жетті. Жарыс халықаралық дәрежедегі спорт шебері, марқұм капитан Азамат Нұрпейісовтің рухына арналды. Турнир «Жеңіс» олимпиадалық резервтегі балалар мен жасөспірімдер спорт мектебінің базасында өтіп, еліміздің барлық өңірлік қолбасшылықтарынан, Ұлттық ұлан Академиясынан, сондай-ақ 6654 және 5573 әскери бөлімдерінен келген 100-ден астам спортшылардың басын қосты.
Жарыс олимпиадалық жүйе бойынша жеті салмақ дәрежесінде ұйымдастырылды. Жеңімпаздар төмендегідей анықталды:
57 кг дейін — ефрейтор Шыңғыс Айтжанов (6556 әскери бөлімі, «Батыс» ӨңҚ);
62 кг дейін — сержант Жандос Өтегұлов (5517 әскери бөлімі, «Батыс» ӨңҚ);
67 кг дейін — қатардағы жауынгер Руслан Қазыбай (5517 әскери бөлімі, «Батыс» ӨңҚ);
73 кг дейін — қатардағы жауынгер Мансұр Мимбулатов (3502 әскери бөлімі, «Батыс» ӨңҚ);
80 кг дейін — кіші сержант Курванжан Гуламдунов (3477 әскери бөлімі, «Шығыс» ӨңҚ);
88 кг дейін — қатардағы жауынгер Әлихан Сафаров (6697 әскери бөлімі, «Орталық» ӨңҚ);
97 кг дейін — курсант Искандер Жайықбаев (Ұлттық ұлан Академиясы).
Жалпыкомандалық есеп бойынша бірінші орынды – «Батыс» өңірлік қолбасшылығының командасы, екінші орынды – Ұлттық ұлан Академиясы, үшінші орынды – «Орталық» өңірлік қолбасшылығы иеленді.
Салтанатты ашылу рәсімінде қатысушыларға құттықтау сөзін Ұлттық ұлан Академиясы бастығының міндетін уақытша атқарушы полковник Александр Корнилов арнады. Ол жарыстың жоғары деңгейде ұйымдастырылғанын және қатысушылардың дайындығы мен жауынгерлік рухын ерекше атап өтті:
– Біз бұл турнирде тек спорттық жекпе-жектерді емес, мінездер шайқасын көрдік. Жеңіске жігері, төзімі, қайраты мен табандылығы барлар жетті. Бұл қасиеттер – әрбір әскери қызметші үшін маңызды. Әділ жекпе-жек пен тәртіп үшін барлық қатысушыларға, бапкерлерге және төрешілерге алғыс білдіремін, – деді полковник Корнилов.
Сондай-ақ капитан Азамат Нұрпейісовтің әкесі Ерік Нұрпейісов жарысқа қатысушыларға жүрекжарды алғысын білдіріп, ұлын еске алуға арналған турнирдің маңыздылығын атап өтті:
– Ұлымның есімін құрметтеп, осы жарысқа атсалысқан әрқайсыңызға алғысым шексіз. Азаматтың өмірі қысқа болса да, мәнді өтті. Ол елге адал қызмет етті. Оның есімін есте қалдыру – біздің отбасы үшін үлкен мәртебе. Турнирді жыл сайын өткізуге бастамашы болған Ұлттық ұлан мен Академия басшылығына ерекше ризашылығымды білдіремін, – деді ол.
Айта кетейік, Азамат Нұрпейісов спортпен мектеп кезінен бастап айналысқан. Бокс пен кикбоксингке деген қызығушылығы мен еңбекқорлығының арқасында қысқа мерзім ішінде жоғары жетістіктерге жетті. Ол – халықаралық дәрежедегі спорт шебері, бірнеше дүркін Қазақстан чемпионы, Кубок иегері, сондай-ақ Италияда өткен әлем чемпионатының күміс жүлдегері (2009), Ирландиядағы әлем чемпионатының қола жүлдегері (2011), Үндістанда өткен Азия чемпионы (2012), Түркияда өткен әлем чемпионатының күміс жүлдегері (2013). Сонымен қатар ол әскери институтты тәмамдап, ҚР ІІМ Ішкі әскерлерінде офицерлік қызмет атқарған.
Турнир ұрпақтар сабақтастығының нышанына айналды және Отанға қызмет етуге өмірін арнаған офицерді еске салды.
ҚР ІІМ Ұлттық ұланының баспасөз қызметі
Қызылорда қаласында ҚР ІІМ Ұлттық ұланының әскери қызметшілері батылдық танытып, өзенге батып бара жатқан адамды құтқарды.
Оқиға Сырдария өзенінің жағасында кешкі уақытта орын алған. Ер адам жағада келе жатып аяғы тайып, суға құлап түсті. Алайда ағыстың күші оның жағаға шығуына жол бермейді..
Осы уақытта 5547 әскери бөлімінің әскери қызметшілері — сержант Мұрат Түсекеев пен кіші сержант Жамбыл Таңсықбай сол маңда болған. Олар ер адамның көмек сұрап айқайлағанын естіп, дереу көмекке келеді.
— Біз жағада келе жатқанда "Құтқарыңдар!" деген дауысты естіп, оқиға орнына жүгіріп бардық. Өзен ағынымен кетіп бара жатқан ер адамды көрдік. Тұншығып, тырмысып жатыр екен. Мұрат дереу арқанға жүгірді, соның көмегімен әлгі ер адамды судан шығардық, — дейді кіші сержант Жамбыл Таңсықбай..
Құтқарылған азамат ұландықтарға ризашылығын білдіріп, кәсіби дайындықтарын ерекше атап өтті.
Бұл жағдай Ұлттық ұлан жауынгерлерінің кез келген төтенше жағдайда көмекке келуге әрқашан дайын екендігінің айқын дәлелі болды.
ҚР ІІМ Ұлттық ұланының баспасөз қызметі
Ішкі істер министрінің орынбасары — Ұлттық ұланның Бас қолбасшысы Аңсаған Балтабеков өзара іс-қимыл жасайтын органдардың өкілдерін ІІМ басқару Академиясындағы Ұлттық ұлан аудиториясының мүмкіндіктерімен таныстырды.
Бұған дейін “Заң мен тәртіп” апталығы аясында Қазақстан Республикасы Ішкі істер министрлігінің Басқару академиясының салтанатты ашылуы өткен болатын.
Аудитория заманауи техникалық құралдармен жабдықталған. Мұнда нақты жағдайларға ұқсас тактикалық сценарийлерді қайта құруға мүмкіндік беретін жүйелер орнатылған. Күнделікті қызметте қолданылатын автоматтандырылған басқару жүйесі де енгізілген.
– Мұндай аудиторияның ашылуы – болашақ офицерлерді даярлаудағы маңызды қадам. Бұл – тәжірибеге негізделген оқыту тәсілін жүзеге асырып, командирлік қабілетті жетілдіруге бағытталған алаң. Әрбір автоматтандырылған жұмыс орны тактикалық іс-қимылдарды модельдеуге арналған және әскери бөлімдерді басқаруға қажетті ақпараттық ресурстарға қол жеткізуді қамтамасыз етеді. Бұл өз кезегінде жаттығу кезінде тактикалық тапсырмаларды тиімді пысықтауға жол ашады, – деді генерал-майор Аңсаған Балтабеков.
Аудиторияға енгізілген цифрлық шешімдерге бірыңғай ақпараттық орта кіреді. Ол өңірлердегі жедел ахуал туралы мәліметтерді орталықтандырылған түрде қабылдап, өңдеуге мүмкіндік береді. Сонымен қатар шешім қабылдауды қолдау жүйесі мен геоақпараттық жүйе енгізілген. Бұл платформаларда нормативтік құжаттар мен жеке құрамның іс-әрекеттерінің алгоритмдері қамтылған.
Сондай-ақ патрульдік бағыттар бойынша әскери жасақтардың қозғалысын нақты уақыт режимінде көрсететін жауынгерлік кезекшілікті бақылау және мониторинг жүйесі де жұмыс істейді.
Қазіргі таңда Ұлттық ұлан еліміздің 21 қаласында қоғамдық тәртіпті қамтамасыз етуде. Қоғамдық қауіпсіздік пен маңызды нысандарды күзету ісіне 7 мыңнан астам әскери қызметші жұмылдырылған. Сонымен қатар ІІМ-ге қарасты 39 қылмыстық-атқару жүйесі мекемелерін күзету де олардың міндетіне кіреді.
Ұлттық ұланның қызметі құқық қорғау органдарымен, атап айтқанда ІІМ, ҰҚК, Сыбайлас жемқорлыққа қарсы іс-қимыл және Қаржылық мониторинг агенттіктерімен бірлескен арнайы операцияларға қатысуды да қамтиды.
ҚР ІІМ Ұлттық ұланының баспасөз қызметі
Әскер – темірдей тәртіп орнаған орта. Бірақ сол әскери бөлім ішінде жүріп те өнердің отын өшірмегендер бар. Солардың бірі – ҚР ІІМ Ұлттық ұланның Шымкент қаласындағы 6698 әскери бөлімінің қызметтік көлік жүргізушісі қатардағы жауынгер Ақәділ Асханұлы.
Ұлттық ұлан қатарына қабылданған Ақәділ әскери жүргізушілер даярлау курсынан өткен. Бүгінде 4 жеке атқыштар ротасында командалық-штабтың көлік жүргізушісі болып қызмет атқарады.
Ол баян, домбыра, фортепиано аспаптарын меңгерген. Бос уақытында қолына баянын алып, қаруластарына рух сыйлап, көңіл-күйлерін көтереді.
– «Анам да, әкем де әуенге жақын жандар. Сондықтан өнер – қанымда бар. Баянымды тастамай, әскерге де алып келдім. Бұл – менің көңіл сергітіп, жан жадыратар сүйікті аспабым. Ұлттық ұланның әскери бөлімінде өтетін іс-шараларда баянмен ән айтып тұратын кездерім болады», – дейді қатардағы Ақәділ Асханұлы.
Айта кетейік, 6698 әскери бөлімінің жауынгерлері Түркістан облысы мен Шымкент қаласы бойынша Қылмыстық атқару жүйесі департаментіне қарасты түзеу мекемелерін күзету, сотталғандардың тәртібін қадағалау, сондай-ақ сотталған азаматтарды айдауылдау бағытында маңызды жауынгерлік қызмет атқарады.
ҚР ІІМ Ұлттық ұланының баспасөз қызметі
ҚР ІІМ Ұлттық ұланы 5573 әскери бөлімінің ефрейторы Достық Жақсылық (видеода – қара жейдеде) елордадағы көпір үстінде болған оқыс оқиғаның алдын алып, бір азаматтың өмірін сақтап қалды.
Оқиға 21 маусымға қараған түні сағат 00:30 шамасында Көктал көшесінің бойындағы «Сарқырама» көпірінде болған. Жедел қызметтерге 1996 жылы туған ер адамның көпір қоршауынан асып тұрғаны туралы хабарлама келіп түскен. Алдын ала мәлімет бойынша, ол ауыр күйзеліс жағдайында болған.
Қызметтен кейін үйіне қайтып бара жатқан ефрейтор Д. Жақсылықтың батыл әрі жедел әрекетінің нәтижесінде полицейлер келгенге дейін жағдайдың ушығуына жол берілмеді. Адам өміріне қауіп төніп тұрғанын байқаған әскери қызметші ойланбастан ер адаммен диалог орнатып, назарын басқа жаққа аударуға тырысқан.
«Басында таза ауаға шыққан біреу шығар деп ойладым, – дейді ефрейтор. – Бірақ жақындай бергенімде, оның жағдайы қалыпты еместігін түсіндім. Қоршаудан асып, бір қолымен ғана ұстап тұр екен. Мұндай сәтте ойланып тұруға уақыт жоқ – әрекет ету керек».
Сабыр мен байыптылық танытқан жауынгер ер адаммен сөйлесіп, оны тыныштандыруға тырысқан. Осы сәтте жанынан өтіп бара жатқан тағы бір азаматпен бірлесіп, ер адамды қоршаудың бергі жағына тартып шығарған. Осылайша қауіпті жағдайдың алдын алды.
Құтқарылған азаматқа шұғыл түрде медициналық және психологиялық көмек көрсетілді. Қазір ол мамандардың бақылауында.
ҚР ІІМ Ұлттық ұланының баспасөз қызметі