Қазақстан ИНТЕРПОЛдың өңірлік семинарына қатысты

Активтерді қайтару жөніндегі комитеттің делегациясы “Күміс бюллетень” және “Күміс хабарлама” пилоттық жобасы бойынша Сингапурда өткен өңірлік семинарға қатысты.

Аталмыш іс-шара ИНТЕРПОЛдың Қаржылық қылмыстарға және сыбайлас жемқорлыққа қарсы күрес орталығы (IFCACC) және Сингапурдың Ішкі істер министрлігінің ұйымдастыруымен өтті.

12 қатысушы мемлекеттің әрқайсысы жүргізіліп жатқан жұмыс туралы ақпаратпен бөлісіп, оның ішінде “Күміс бюллетень” және “Күміс хабарлама” жобасын іске асырудың практикалық аспектілерін түсіндірді.

Қазақстандық делегация Комитет жұмысының нәтижелерімен таныстырып, алғашқы “Күміс хабарламаның” шығарылуы туралы хабар берді.

Семинар аясында сұрау салуларды дайындау және өңдеу, ИНТЕРПОЛдың жаңа құралын құқықтық реттеу және одан әрі қолдану мәселелерін талқылауға арналған практикалық сессиялар өткізілді.

Алынған білімдер халықаралық ынтымақтастықты нығайтуға және Қазақстанның активтерді іздеу және қайтару бойынша мүмкіндіктерін кеңейтуге ықпал етеді.