Астанада Конституцияның 30 жылдығына арналған халықаралық конференция өтті
Телеграмм КС - https://t.me/consot_kz
«Конституция және мемлекеттілік: құқық және болашақ диалогы» халықаралық ғылыми-практикалық конференциясына шет елдердің конституциялық соттарының судьялары, жетекші отандық және шетелдік құқықтанушы ғалымдар, Парламент депутаттары, мемлекеттік органдардың, кәсіби заң қоғамдастығының, сондай-ақ халықаралық ұйымдардың өкілдерін қоса алғанда, 500-ден астам адам қатысты.
Мемлекет Басшысының қатысуымен өткен конференцияның салтанатты рәсімі мен пленарлық сессиясы Тәуелсіздік сарайында өтті. Пленарлық сессия барысында Конституцияның 30 жылдығына арналған пошта маркасын сөндіру рәсімі өтті, сондай-ақ Ұлттық Банк мерейтойлық монеталар сериясы таныстырды.
Салтанатты рәсімнен кейін конференция жұмысы үш сессия форматында – Конституциялық Сотта, Maqsut Narikbayev University және Л.Н. Гумилев атындағы Еуразия ұлттық университетінің алаңында жалғасты.
Конституциялық Соттағы сессия конституциялық тәртіптің тұрақтылығы, тиімді құқық қолдану және қоғамдық қауіпсіздік, құқықтық нигилизмнің алдын алуға және құқықтың үстемдігін қамтамасыз етуге мүмкіндік беретін Ата заңды қорғау тетіктері, сондай-ақ мемлекет пен қоғамның үдемелі дамуының іргелі шарты ретінде конституциялық тұрақтылық арасындағы байланыс мәселелеріне арналды.
Қ.А. Яссауи атындағы Халықаралық қазақ-түрік университетінің ректоры Жанар Темірбекова Яссауиден бастап Қазақстан Республикасының Конституциясына дейінгі адам құқықтары идеясының эволюциясы туралы айтып берді. С.Ф. Чернышевский атындағы Саратов ұлттық зерттеу университетінің доценті Зульфия Байниязова цифрландыру жағдайында құқық және заңнама тақырыбын және олардың дамуының негізгі бағыттары жөнінде сөз қозғады.
Maqsut Narikbayev University және Л.Н. Гумилев атындағы Еуразия ұлттық университетінің алаңдарында қатысушылар заң шығарудағы Конституциялық қағидаттардың рөлін, конституциялық бақылау функцияларын және заңдардың Ата заңға сәйкестігінің маңыздылығын талқылады. Теңдік, этносаралық келісім және әлеуметтік әділеттілік құндылықтарына негізделген конституциялық бірегейлік қоғам мен мемлекеттің тұтастығының тірегі болып табылатыны, ал азаматтармен диалог оны өзгерістер жағдайында сақтауға көмектесетіні атап өтілді.
О.Е. Кутафин атындағы Мәскеу мемлекеттік құқық университетінің доценті Айгуль Чупилкина мемлекеттік дамудың көпқырлылығында бірліктің конституциялық фактор ретіндегі рөлі туралы айтып берді.
Fortune Рartners бас серіктесі және Assistant Professor MNU Дана Токмурзина әкімшілік әділетте конституциялық құқықтардың іске асырылуы туралы хабарлады.
Оснабрюк университетінің профессоры Георг Геск қазіргі әлемдегі конституционализм тақырыбын ұлттардың бірегейлігі, бірлігі, келісімі мен тұрақтылығының факторы ретінде көтерді.
Тренто университеті мен Кристиан Альбрехт университетінің ғылыми қызметкері және оқытушысы Кевин Сильвестри Италия Конституциялық Сотының интерпретациялық және бақылаушы шешімдері және олардың сот және заң шығарушы билікке әсері туралы айтты.
Сонымен қатар, конференция аясында Қазақстан Республикасы мен Армения Республикасы конституциялық соттары төрағаларының екіжақты кездесуі өтті. Оның барысында өзара түсіністік туралы Меморандумға қол қойылды. Бұл конституциялық құқық саласындағы халықаралық ынтымақтастықтың маңыздылығын көрсетеді.