Сарапшылар брифингі: вакцинация – әр буын үшін қауіпсіз қорғаныс
19–25 сәуір аралығында Қазақстанда Еуропалық иммундау апталығы өтуде, бұл іс-шараға биыл 20 жыл толып отыр. Науқан жұқпалы аурулардың алдын алудың ең тиімді әрі қауіпсіз тәсілдерінің бірі ретінде екпелердің маңыздылығы туралы халықтың хабардарлығын арттыруға бағытталған.
Иммундау денсаулық сақтау саласындағы мемлекеттік саясаттың басым бағыттарының бірі болып қала береді. Вакциналар өз тиімділігін іс жүзінде дәлелдеді: олардың арқасында шешек толық жойылып, полиомиелиттің таралуы іс жүзінде тоқтатылды, сондай-ақ бірқатар инфекциялармен сырқаттанушылық айтарлықтай төмендеді. Қазақстанда соңғы онжылдықтарда жұқпалы аурулар деңгейі ондаған және жүздеген есе азайды.
Бүгінде иммундау бағдарламасы 21 инфекциядан қорғауды қамтиды және Дүниежүзілік денсаулық сақтау ұйымының ұсынымдарына сәйкес келеді. Пайдаланылатын вакциналар қатаң сапа бақылауынан өтеді және олардың қауіпсіздігі мен тиімділігін растайтын халықаралық сертификаттарға ие.
Сарапшылар атап өткендей: вакцинация – қауіпсіз медициналық процедура. Әр екпе алдында міндетті түрде дәрігер тексеруі жүргізіледі, қарсы көрсетілімдер жоққа шығарылады, ал пациенттер ықтимал реакциялар туралы хабардар етіледі. Көп жағдайда олар жеңіл әрі қысқа мерзімді болады, ал ауыр асқынулар өте сирек кездеседі және қатаң медициналық бақылауда болады.
Жиі таралған мифтерге ерекше назар аударылады. Атап айтқанда, вакцинаның аутизм тудыруы мүмкін деген пікір ғылыми тұрғыдан расталмаған. Бұл миф 1998 жылғы зерттеуден кейін пайда болған, алайда ол кейіннен сенімсіз деп танылып, кері қайтарылған. 657 мыңнан астам бала қатысқан ірі зерттеу де вакцинация мен аутизм арасында байланыс жоқ екенін дәлелдеді. Демек, қазіргі ғылым вакциналардың қауіпсіздігін нақты растайды.
Дәлелденген тиімділігі мен қауіпсіздігіне қарамастан, жалған ақпараттың таралуы және вакцинадан бас тарту жағдайларының көбеюі әлі де өзекті мәселе болып отыр. Ал қызылша мен көкжөтел жағдайларының басым бөлігі екпе алмаған балалар арасында тіркеледі, бұл уақытылы иммундаудың маңыздылығын тағы да айқындайды.
Мамандар вакцинация тек жеке қорғаныс қана емес, сонымен бірге ұжымдық қауіпсіздікке қосылған үлес екенін, ол халықтың ең осал топтарын қорғауға мүмкіндік беретінін атап өтуде.
Қазақстан иммунопрофилактика жүйесін нығайтуды жалғастырады, қауіпсіз вакциналардың қолжетімділігін қамтамасыз етіп, болашақ ұрпақтың денсаулығын қорғауды жалғастырады.