V Халықаралық экологиялық конгресс

Астана қаласында мемлекеттік органдардың, ғылыми және сарапшылық қауымдастықтың, халықаралық ұйымдар мен азаматтық сектор өкілдерінің басын қосқан V Халықаралық экологиялық конгресс өтті.

Конгрестің негізгі тақырыбы экология мен адам денсаулығының өзара байланысы болды. Қатысушылар қоршаған ортаның жай-күйі халықтың өмір сүру сапасы мен денсаулығына тікелей әсер ететінін атап өтті.

Талқылаулар барысында экологиялық факторлардың қоғамдық денсаулыққа әсеріне ерекше назар аударылды. Атмосфералық ауаның ластануы, климаттың өзгеруі, су ресурстарының жай-күйі және техногендік жүктемелер созылмалы аурулардың өсуіне және өмір сүру ұзақтығының қысқаруына ықпал ететін елеулі қауіптерді қалыптастырады.

Су және денсаулық жөніндегі хаттаманың маңыздылығына ерекше мән берілді. Бұл құжат экологиялық және санитариялық-эпидемиологиялық күн тәртібін біріктіріп, қоршаған ортаның сапасын жақсарту арқылы адам денсаулығын қорғауды басты орынға қояды. Оны іске асыру аурулардың алдын алуға, денсаулық сақтау жүйесіне түсетін жүктемені азайтуға және халықтың өмір сүру сапасын арттыруға бағытталған жүйелі өзгерістерге апаратын маңызды қадам ретінде қарастырылады.

Санитариялық-эпидемиологиялық қызметтің қоршаған орта факторларының теріс әсерінің алдын алу, мониторинг жүйесін дамыту және медицинаның профилактикалық бағытын нығайту жөніндегі шараларды іске асырудағы рөлі атап өтілді.

Қатысушылар тиімді экологиялық саясатты қалыптастыру үшін мемлекеттік органдардың, халықаралық ұйымдардың және азаматтық қоғамның күш-жігерін біріктіру, сондай-ақ салааралық өзара іс-қимылды күшейту қажеттігін атап өтті.

Конгресс ашық диалог жүргізу, тәжірибе алмасу және тұрақты дамуды қамтамасыз етуге, қазіргі және болашақ ұрпақтың денсаулығын сақтауға бағытталған практикалық шешімдерді әзірлеу алаңына айналды.