Астанада «ЭКСЖ» Ұлттық жобасы қоғамдық кеңесінің екінші отырысы өтті

2025 жылғы 26 қарашада Астанада "Тұрғын үй-коммуналдық шаруашылықты жаңғырту және дамыту қазақстандық орталығы" АҚ-ның базасында өткен "Энергетикалық және коммуналдық секторларды жаңғырту" ұлттық жобасының (ЭКСЖ) қоғамдық кеңесінің екінші отырысы өтті. ҚР ҰЭМ Табиғи монополияларды реттеу комитеті отырыс жұмысына қатысып, Ұлттық жобаны іске асырудың ашықтығы мен тиімділігін қамтамасыз етудегі өзінің түйінді рөлін растады.

Қоғамдық кеңес ашықтықты қамтамасыз ету және Ұлттық жобаны іске асырудың тиімділігін арттыру үшін құрылған.

Отырыс аясында ТКШ ҚазОрталығының Басқарма төрағасы Нұрлан Солтамбеков пен "Бәйтерек" ҰБХ басқарушы директоры Әлия Мырзағалиеваның — техникалық және қаржылық операторлардың есептері тыңдалды.

Техоператор сумен жабдықтау, су бұру, жылу және электрмен жабдықтау салаларындағы жобаларды қарауды қоса алғанда, жұмыстың негізгі қорытындыларын ұсынды. Қаржы операторы қаржыландырудың ағымдағы жай-күйі туралы баяндады: 2025 жылғы 25 қарашадағы деректер бойынша табиғи монополиялар субъектілерінің 63 өтінімі қаралып, оның 43-і 72,2 млрд теңге сомасына келісілді, 32 млрд теңге сомасына 20 өтінім пысықтауға жіберілді немесе кері қайтарылды.

Ұлттық жобаны белсенді іске асыру жалғасуда: бүгінгі жағдай бойынша ЭКСЖ платформасында коммуналдық шаруашылықтың барлық секторлары бойынша жалпы бағалау құны 473,9 млрд теңгені құрайтын 179 өтінім тіркелген.

Талқылаудың маңызды аспектісі ТКШ және энергетика секторы үшін отандық материалдар мен жабдықтар шығаруды ынталандыруға бағытталған отандық тауар өндірушілерді дамыту болды.

Комитет "ЭКСЖ" Ұлттық жобасы шеңберінде іске асырылатын іс-шаралардың айқындығын, ашықтығын және тиімділігін қамтамасыз ете отырып, қоғамдық кеңестің жұмысына белсенді қатысуды жалғастырады.