Алматыда көші қон деректерін басқару мәселелері бойынша Алматы процесінің техникалық сарапшылар тобының отырысы өтті
Іс-шара 2025 жылғы 24-25 сәуірде Баку қаласында өткен Алматы процесінің 3-ші министрлік конференциясында басталған жұмыстың жалғасы болды. Техникалық сарапшылар тобының отырысын Қазақстан Республикасының Еңбек және халықты әлеуметтік қорғау министрлігі мен Алматы процесінің Хатшылығы – Халықаралық көші-қон ұйымы мен БҰҰ Босқындар ісі жөніндегі жоғарғы комиссарының басқармасы бірлесіп ұйымдастырды.
Отырыс жұмысына Алматы процесіне қатысушы мемлекеттердің және байқаушылардың, халықаралық ұйымдардың, сондай–ақ бейінді талдау және зерттеу институттарының өкілдері қатысты.
Іс-шараның ресми ашылуы Қазақстан Республикасы Еңбек және халықты әлеуметтік қорғау министрлігі Көші-қон комитеті төрағасының орынбасары Эльмира Тажиханованың, Қазақстандағы ХКҰ миссиясының басшысы Серхан Актопрактың және БҰҰ БЖКБ Орталық Азиядағы өкілінің м.а. Думитру Липканудың қатысуымен өтті.
Отырыс барысында қатысушылар көші-қон деректерін жинауға, талдауға және алмасуға ұлттық тәжірибелер мен әдіснамалық тәсілдерді ұсына отырып, мазмұнды тәжірибе алмасты. Кәсіби топтардың объективі арқылы еңбек көші-қонын зерттеу мәселелеріне ерекше назар аударылды, бұл еңбек нарығының құзыреттілігі мен динамикасына сұранысты дәлірек бағалауға мүмкіндік береді.
Талқылаудың жеке блогы көші-қон деректерінің сапасын, қолжетімділігін және жеделдігін арттыруға бағытталған цифрлық шешімдер мен заманауи технологиялық құралдарға арналды. Қатысушылар нақты деректерге негізделген саясатты одан әрі ілгерілету үшін ведомствоаралық өзара іс-қимылды нығайтудың және өңірлік құрылымдармен әріптестікті кеңейтудің маңыздылығын атап өтті.
Отырыс қорытындысы бойынша қатысушы мемлекеттер көші-қон деректерін басқару саласындағы ынтымақтастықты одан әрі дамытуға бейілділігін растады және 2026 жылға жоспарланған Алматы процесінің жоғары лауазымды тұлғаларының алдағы кездесуі үшін ұсынымдар дайындау бойынша бірлескен жұмысты жалғастыруға келісті.
Алматы процесі өңір мемлекеттерінің мүдделеріне сай келетін ұзақ мерзімді және тұрақты саясатты әзірлеуге жәрдемдесе отырып, көші-қон мәселелері бойынша диалогты тереңдету үшін негізгі өңірлік платформа рөлін атқаруды жалғастыруда.
Естеріңізге сала кетейік, 2013 жылы құрылған Алматы процесі бес қатысушы мемлекетті – Әзірбайжан, Қазақстан, Қырғызстан, Тәжікстан және Түркияны, сондай-ақ Иран, Италия, Түркіменстан, Пәкістан, Өзбекстан және түркі мемлекеттері ұйымын қоса алғанда, бірқатар байқаушы мемлекеттерді біріктіреді.