Батыс Қазақстан және Ақтөбе облыстарында газ баллон жабдығы бар машиналар айыппұл тұрағына жөнелтілуде

Құтқарушылар мен полиция қызметкерлері жабық паркингтерде газ жабдықтары бар машиналардың бар-жоғын тексеруде. Сонымен қатар тұрғындарға ондай машиналарды тұраққа қоюға тыйым салынатынын түсіндіруде.

Елімізде «Газбаллон» жедел профилактикалық іс-шарасы өткізілуде. Ақтөбе және Батыс Қазақстан облыстары да қалыс қалған жоқ.

Бүгін, 24 тамызда Төтенше жағдайлар департаменті мен Полиция департаментінің қызметкерлері «Газбаллон» республикалық жедел алдын алу іс-шаралары аясында рейдтік іс-шаралар өткізуде. Рейдтер барысында Орал қаласының «Орал», «ASIA MALL» сауда-ойын-сауық орталықтарының, «Юнис сити» және «Олимп» тұрғын үй кешендерінің жерасты автотұрақтарында өрт қауіпсіздігі ережелерін бұзудың 4 фактісі анықталды, олар бойынша әкімшілік іс қозғалды. Аталған іс-шаралар барысында барлық автокөлік иелеріне қауіпсіздік талаптары жеткізілді.

Сонымен қатар, рейдтер барысында автокөлік құралдарына тиісті рұқсатсыз газ-отын жүйесін орнатқан жосықсыз автокөлік иелерін анықтау жұмыстары жүргізілуде. Құжаттары жоқ газ баллонды жабдықтары бар 5 автомашина айыппұл тұрағына жөнелтілді.

«Газбаллон» жедел профилактикалық іс-шарасы жалғасуда.

ТЖМ өрт қауіпсіздігі ережелерінде қозғалтқыштары сығылған табиғи газбен немесе сұйытылған мұнай газымен жұмыс істейтін газ баллонды жабдықпен жарақтандырылған, өзге мақсаттағы және оларға жапсарлас салынған ғимараттарда, сондай-ақ жер деңгейінен төмен орналасқан автотұрақтар мен жабық типтегі үй-жайлар мен паркингтердегі автокөліктердің тұрағына тыйым салынғанын еске салады.

 

 

ҚР ТЖМ Өртке қарсы қызмет комитеті