«Ауыл құтқарушылары» бағдарламасы: СҚО-да ерікті өртке қарсы құралым пункті жаңартылды

  «Ауыл құтқарушылары» бағдарламасы аясында Тайынша ауданының Макашевка ауылында ерікті өртке қарсы құралымының өрт сөндіру пункті реновациядан өтті.

  2021 жылдан бері жұмыс істеп келе жатқан өрт сөндіру бөлімшесі 740-тан астам тұрғыны бар төрт ауылдың өрт қауіпсіздігін, сондай-ақ іргелес табиғи аумақтардың қорғалуын қамтамасыз етеді.

  Жаңарту жұмыстары пункт орналасқан «Асар» ЖШС күшімен жүргізілді. Реновация аясында салқындату және қоректендіру жүйелеріне, сондай-ақ өрт сөндіру автокөлігінің жүріс бөлігіне жөндеу жұмыстары жасалды. Техника барлық қажетті өрт-техникалық жабдықтармен толық жабдықталған, бұл өрттерге жедел ден қою тиімділігін айтарлықтай арттыруға мүмкіндік береді.

  Материалдық-техникалық базаны жаңарту бөлімшенің жұмыс тиімділігін арттырып, оқиға орнына жету уақытын қысқартады және өртті бастапқы кезеңінде сөндіруге мүмкіндік береді. Бұл өз кезегінде залалды барынша азайтып, төтенше жағдайлар кезінде зардап шеккендер санын төмендетуге ықпал етеді.

  Мұндай іс-шаралардың жүзеге асырылуы ауылдағы өрт қауіпсіздігін нығайтуға, ерікті бөлімшелердің дайындық деңгейін арттыруға және халық пен аумақтарды төтенше жағдайлардан қорғауға бағытталған «Ауыл құтқарушылары» бағдарламасының міндеттерін орындауға ықпал етеді.