ІІМ ауғандық апиынды жеткізудің сыртқы арнасының жолын кесті

     Ішкі істер министрлігі "Заң мен Тәртіп" қағидатын іске асыру аясында халықаралық есірткі тасымалы арналарының жолын кесу бойынша арнайы іс-шаралар жүргізуде.

     Қазақстан және Қырғызстан Ішкі істер министрліктері тығыз өзара іс-қимыл мен шекара маңы ынтымақтастығы аясында апиын тобына жататын есірткі заттарын жеткізудің сыртқы трансұлттық арнасының жолын кесті. 

- Бірлескен арнайы операция барысында Шымкент қаласында Қазақстанның екі азаматы ұсталды. Олардан шамамен 5 келі ауғандық апиын есірткі заты тәркіленді.

Аталған факті бойынша Қазақстан Республикасы Қылмыстық кодексінің 297-бабының 3-бөлігіне сәйкес сотқа дейінгі тергеп-тексеру басталды. Күдіктілер уақытша ұстау изоляторына қамалды.

Қазіргі уақытта олардың әрекеттеріне есірткі контрабандасы және трансұлттық ұйымдасқан қылмыстық топқа қатысу белгілері бойынша қосымша құқықтық баға беру мәселесі қарастырылуда, - деді ІІМ есірткі қылмысына қарсы іс-қимыл комитетінің басқарма бастығы Бақытжан Әмірханов.

     Қазақстан Республикасы Ішкі істер министрлігі халықаралық ынтымақтастықты нығайту аясында еліміздің аумағына есірткі жеткізудің сыртқы арналарының жолын кесуге, сондай-ақ ел аумағы арқылы жүзеге асырылатын есірткі транзитіне қарсы бағытталған нысаналы арнайы операцияларды жалғастырады.