Қостанай облысында IT-саласы қарқынды дамып келеді

Қостанай облысында цифрландыру және инновациялық технологияларды дамыту бағытындағы жұмыстар жүйелі түрде жалғасуда. Өңірде IT-стартаптарды қолдау, жасанды интеллект технологияларын енгізу, сондай-ақ жаңа буын мамандарын даярлау ісіне ерекше басымдық берілуде.

Бүгінде өңірдегі технологиялық экожүйенің маңызды орталығына айналған Qostanai Hub қысқа уақыт ішінде елеулі нәтижелерге қол жеткізді. Жалпы аумағы 4,5 мың шаршы метрді құрайтын хаб базасында стартап-командалар мен жас әзірлеушілерге арналған 40 заманауи жұмыс орны, білім беру және тәжірибе алмасуға бағытталған үш оқу залы, сондай-ақ 100 орындық конференц-зал жұмыс істейді.

IT саласына деген қызығушылықтың артуына байланысты Қостанай облысында жалпы аумағы 8 мың шаршы метр болатын толыққанды IT-парк құру жобасы қолға алынуда. Жаңа кешен құрамында Tomorrow School халықаралық жасанды интеллект мектебі, өңірлік IT-хаб және жасанды интеллект зертханалары шоғырланбақ. Бұл бастама өңірдің технологиялық әлеуетін арттырып, Қостанай облысын еліміздегі жетекші цифрлық орталықтардың біріне айналдыруға мүмкіндік береді.

Соңғы екі жыл ішінде Qostanai Hub өңірдің инновациялық дамуына елеулі серпін берді. Осы уақыт аралығында 270-тен астам іс-шара ұйымдастырылып, оған 7 мыңнан аса адам қатысты. Сонымен қатар 155 стартап-жоба қолдау тауып, олардың бірқатары еліміздегі халықаралық IT-технопарк – Astana Hub резиденттері қатарына қосылды.

Өңір жастары үшін білім алу мүмкіндіктері де кеңейтілуде. Қостанай облысының тұрғындарына Astana Hub платформасындағы 357-ден астам білім беру курсына қолжетімділік ұсынылған. Сонымен қатар жергілікті перспективалы стартаптар өз жобаларын дамыту мақсатында жалпы көлемі 325 мың АҚШ долларын құрайтын инвестиция тартты.

Өңірдегі IT-индустрияның дамуы Astana Hub резиденттері санының артуымен де байқалады. Егер 2022–2024 жылдары Қостанай облысында мұндай компаниялар саны беске жуық болса, өткен жылы олардың саны 13-ке жетті. Биыл бұл көрсеткішті 25 компанияға дейін ұлғайту жоспарланып отыр. Бұл өңірде тұрақты әрі бәсекеге қабілетті IT-кластердің қалыптасып келе жатқанын көрсетеді.

Болашақ мамандарды даярлау бағытында да маңызды жобалар жүзеге асырылуда. Солардың бірі – Tomorrow School халықаралық жасанды интеллект мектебі. Қазіргі таңда мұнда 50 технологиялық жұмыс орны ашылып, жастар жасанды интеллект, деректерді талдау және машиналық оқыту бағыттары бойынша тәжірибелік білім алуда.

Алдағы уақытта өңірде акселерациялық бағдарламаларды күшейту, халықаралық серіктестікті кеңейту және жаңа IT-жобаларды қолдау жұмыстары жалғасады. Бұл бастамалар Қостанай облысының цифрлық әлеуетін нығайтып қана қоймай, жаңа жұмыс орындарын құруға және өңір экономикасының бәсекеге қабілеттілігін арттыруға ықпал етеді.